सुरु भयो नेपाल फेष्टिबल, पूर्वप्रम हातोयामा पनि सरिक (फ़ोटो फ़िचर)

टोकियो – आईतबार टोकियोमा नेपाल फेष्टिबलको उदघाटन समारोहमा बोल्दै जापानका पूर्व प्रधानमन्त्री डा. हातोयामा युकिओले नेपाल एक पटक पुग्नैपर्ने देश भएकोले जापानी जनताहरुलाई एक पटक नेपाल जान आग्रह गर्नुभएको छ ।

डा. हातोयामाले हालै मात्र नेपालको ५ दिने अनौपचारिक भ्रमण गरी फर्केको स्मरण गर्दै बिहान उठ्दाबित्तिकै अग्ला अग्ला लामबद्ध भएर ठिंग उभिएका हिमशृँखलाहरु देख्न पाईने, शान्तिका अग्रदूत गौतम बुद्ध जन्मेको पवित्र ठाउँ लुम्बिनी र प्राकृतिक सौन्दर्यताले भरिपूर्ण देश नेपाल आफुलाई साँच्चिकै मनमोहक लागेको बताउनुभयो । ’त्यसैले जापानी मित्रहरु एकफेरा नेपाल घुम्न जान म आग्रह गर्न चाहान्छु’ – डा. हातोयामाले भन्नुभयो – ’नेपाल भ्रमणबाट यहाँहरुले स्वर्णिम आनन्द लिन सक्नु हुने छ । जापानमा नेपाल फेष्टिबलको आयोजना गरेर आफ्नो देशलाई चिनाउने काम गर्नु हुने सबैमा बधाई तथा सफलताको शुभकामना दिन चाहान्छु ।’  सो अवसरमा डा. हातोयामाले छोटो नेपाल भ्रमणबाट आफ़ु अयन्तै प्रभावित भएको पनि बताउनुभयो ।

उसै पनि संधैजसो भिड लागिरहने उएनो पार्कमा यतिखेर बिभिन्न पर्व र अवसरहरु लामबध्द छन ।यतिखेरको सिजनमा लोकेशन उएनो पार्क रोजिनु नेपाल फ़ेष्टीबलको लागि सुनमा सुगन्ध थपियो नै त्यसमाथि जापानी पूर्वप्रम हातोयामाको अनपेक्षित गरिमामाय उपस्थिति र नौमति बाजामा जापानी जोडीको बिबाह अर्को आकर्षणको केन्द्रबिन्दु बन्न पुगेको थियो । फ़ेष्टिबलको दोश्रो दिन भोलि पनि जारी रहने छ ।   ***