राष्ट्रपतिले जथाभावी गर्न मिल्दैन: नेता नेपाल

काठमाडौं- पूर्वप्रधानमन्त्री एवं एमाले बरिष्ठ नेता माधवकुमार नेपालले राष्ट्रपति डा. रामवरण यादवसँग भेट गरेका छन् ।

बिहीबार बिहान राष्ट्रपति रामवरण यादवसँग भएको भेटमा नेपालले अध्यादेशबाट सरकारले ल्याएको बजेट प्रमाणिकरण गर्न दबाब आएकाले सोचविचार गरेर मात्रै निर्णय गर्न सुझाव दिएका हुन् ।

‘राष्ट्रपति संविधानको संरक्षक हो, जथाभावी गर्न मिल्दैन,’ उनले भने, ‘स्वदेशी, विदेशीले दबाब दिन सक्छन्, त्यस्तो दबाबमा नपर्नु भन्ने सुझाव दिएँ ।’

सरकारले अध्यादेशबाट ल्याउन लागेको बजेट सदर गर्न केही अर्थविद्ले सल्लाह दिएकोमा नेता नेपालले आपत्ति जनाए । सहमतिका लागि आफूले र पूर्वप्रधानमन्त्री झलनाथ खनालले राजीनामा दिएको स्मरण गर्दै नेपालले प्रधानमन्त्री बाबुराम भट्टराईलाई पनि राजीनामा दिन सुझाव दिए । ***