सभासद बबनमाथि हत्या र अपहरणको अभियोग

काठमाडौं– स्वतन्त्र सभासद् बबन सिंहमाथि फेरि हत्या र अपहरणको अभियोग लागेको छ। राजेशमान सिंहले बबनसहित लालबहादुर पाण्डे शास्त्री र रविभूषण पाण्डेविरुद्ध आफ्नो अपहरण गरी हत्या प्रयास गरेको जाहेरी दिएपछि प्रहरी बबनको खोजीमा छ।

भारत घर भएका शास्त्रीद्वय काठमाडौंको न्यूरोडमा ज्योतिष कार्यालय सञ्चालन गर्दै आएका छन् ।

संविधान सभा सचिवालयले बबनलाई पक्राउ गरी अनुसन्धान गर्न प्रहरीलाई स्वीकृति दिए पनि प्रहरीले उनलाई पक्राउ गर्न भने सकेको छैन। दुवै अभियुक्तलाई भने अपहरणमा संलग्न रहेको अभियोगमा हिरासतमा राखिरहेको छ।

प्रहरीको मोष्ट वान्टेड सूचीमा रहे पनि भूमिगतरुपमै संविधान सभाको उम्मेदवार बनी विजयी बनेका बबन विभिन्न आपराधिक घटनामा पहिल्यै जोडिएका थिए।

बबन संविधानसभा निर्वाचनमा रौतहट क्षेत्र नम्वर १ बाट प्रत्यक्ष निर्वाचित हुन् ।