गैरआवासीय नेपाली संघ अन्तरराष्ट्रिय समन्वय परिषदको पाँचौ ग्लोबल सम्मेलन यहि अक्टोबर १२ देखि १५ सम्म राजधानी काठमाडौंमा हुन गईरहेको छ ।
उपप्रधान तथा परराष्ट्रमन्त्री नारायणकाजी श्रेष्ठको अध्यक्षतामा विश्व सम्मेलन उच्चस्तरीय आयोजक समितिको गत बिहीबार बसेको बैठकले सम्मेलनका क्रममा आयोजना हुने कार्यक्रम सार्वजनिक गरेको छ । यस पटकको सम्मेलनकाक्रममा नागरिक समाजको आकांक्षा र दृष्टिकोण, दैवी प्रकोप सतर्कता र तयारीमा गैरआवासीय नेपालीको भूमिका, दोश्रो पुस्ताका गैरआवासीय नेपालीको सहभागिता, नेपालमा विदेशी लगानीका अवसर र चुनौती, खाडी मुलुकहरुमा वैदेशिक रोजगारीलाई मर्यादित तथा सुरक्षित बनाउन चालिनुपर्ने कदम, गैरआवासीय नेपाली सम्बन्धी ऐन नियमले प्रदान गरेका सुविधा लगायत विषयमा छलफल हुने भएको छ ।
हरेक दुइ वर्षमा आयोजना हुने सम्मेलनले यस पटक नयाँ कार्यसमिति समेत चयन गर्ने छ । हालसम्म एनआरएन अन्तरराष्ट्रिय समन्वय परिषदका उपाध्यक्ष जीवा लामिछाने र वर्तमान अध्यक्ष देवमान हिराचनले अध्यक्ष पदमा दाबेदारी प्रस्तुत गरिसकेका छन् ।
यसैगरी उपाध्यक्षमा अष्ट्रेलियाबार्ट इन्द्रा वन र बेलायतबाट क्याप्टेन हितमान गुरुङले उम्मेदवारीको घोषणा गर्नुभएको छ भने महासचिवमा जापानबाट डा. कुमार बस्नेत र अमेरिकाबाट बिष्णुमाया परियारबीच प्रतिस्पर्धा हुने देखिएको छ । यसैगरी कोषाध्यक्षमा जापानबाट ब्यवसायी भवन भट्ट, नम्रता पाण्डे (हेमप्रभा) र अष्ट्रेलियाबाट गोवा कटुवाल भिड्ने भएका छन् । एशिया प्यासिफिकको संयोजकमा एनआरएन जापानका संस्थापक अध्यक्ष राजन प्रधानाङ्गले र उपसंयोजकमा जापानबाटै हालका आईसीसी सदस्य किरणविक्रम थापाले उम्मेदवारीको घोषणा गर्दै नेपालतर्फप्रस्थान गरेका छन् । अन्तिम समयसम्म बिभिन्न पदहरुमा उम्मेदवारी दिने क्रम अझ बढ्न सक्ने संभावना देखिएको छ ।
बिश्वका ५६ देशमा बिस्तार भईसकेको एनआरएन अभियानको यस पटकको ग्लोबल सम्मेलनमा बिभिन्न मुलुकहरुबाट गरी करिब सात सयले सहभागिता जनाउने अनुमान गरिएको छ । सन् २००३ देखि सुरु भएको एनआरएन अभियान अर्न्तर्गत यसपटकको सम्मेलनको मुख्य नारा ‘हाम्रो सञ्जाल, हाम्रो पहिचानः समृद्ध नेपाल’ रहेको छ । ३ दिनसम्म चल्ने सम्मेलनमा भाग लिनका लागि जापानबाट पनि उल्लेख्य संख्यामा नेपालीहरु नेपाल पुगिसकेका छन् भने र्फकने क्रम जारी छ । ***
