गैर आवासीय नेपाली संघ अन्तर्राष्ट्रिय समन्वय परिषद् (आईसीसी) को विभिन्न पदहरुमा उम्मेदवारी घोषणा हुने क्रममा कोषाध्यक्ष पदको लागि जापानबाट ब्यवसायी भवन भट्टले उम्मेदवारीको घोषणा गर्नुभएको छ । यसअघि सोही पदको लागि जापानबाटै नम्रता पाण्डेले उम्मेदवारीको घोषणा गरिसक्नुभएको छ । लामो समयदेखि जापानमा रहेर व्यवसाय गर्दै आउनुभएका भट्ट नेपाल पर्यटन बर्ष २०११ का लागि अवैतनिक दूत समेत हुनुहुन्छ । उम्मेदवार भट्टद्वारा जारी गरिएको घोषणा पत्रको पूर्ण पाठ यस प्रकार छ ।
कोषाध्यक्ष पदमा उम्मेदवारीका लागि भवन भट्टद्वारा जारी घोषणा-पत्र
महान चाड दशैंसँगै विश्वभर रहेका नेपालीहरुको अर्को महानपर्व पनिसँगै आइरहेको छ । संसारका कुना काप्चामा रहेका नेपालीहरुलाई एकताको भावनात्मक साङ्लोमा गाँस्ने गैर आवासीय नेपाली संघ (एनआरएनए) को पाचौं विश्व सम्मेलन हाम्रो सम्मुख रहेको छ । आजभन्दा आठ बर्ष अघि नेपालीका लागि नेपाली भन्ने मूल नाराका साथ स्थापना भएको गैर आवासीय नेपाली संघले आफ्नो छुट्टै पहिचान बनाइसकेको छ । यसले सार्क मुलुक बाहेक विश्वका विभिन्न छपन्न मुलुकमा छरिएररहेका नेपालीलाई भावनात्मक सूत्रमा बाँध्न महत्वपूर्ण भूमिका निर्वाह गरेको छ । एनआरएनए अव एक स्थापित नाम बनिसकेको छ भने नेपाल सरकारले पनि यसलाई सम्वोधन गर्दै ऐन र नियमावली ल्याइसकेको छ ।
पछिल्लो समयमा बाक्लिएको विदेशीने क्रमले करिब तीस लाख नेपाली देश बाहिर रहेका छन् । राष्ट्रको मेरुदण्डकारुपमा रहेका धेरै युवाहरु विदेशमा छन् । यस्तो अवस्थामा एनआरएन अभियानको सार्थकताले अझ महत्व राख्छ भन्ने मेरो बुझाइ छ ।गैर आवासीय नेपाली संघ (एनआरएनए) को स्थापनाकालदेखि मेरो सक्रियताको पहिलो उद्देश्य भनेकै एनआरएन अभियानको निरन्तरता र यसलाई बलियो बनाउनु हो । म यस अभियानमा निरन्तर लागिरहने प्रतिबध्दता प्रकट गर्न चाहन्छु ।
अहिलेको अवस्थालाई नियाल्ने हो भने गैर आवासीय नेपालीहरुले नेपालमा विभिन्न सामाजिक कार्यको सुरुआत गर्नुको साथै स्वदेश र विदेशमा रहेका नेपालीहरुलाई सहयोग गरिरहेका छन् । प्रवासमा आफू रहेको देशलाई विपत्ती र समस्या पर्दा पनि तन, मन र धनले सहयोग गरिरहेका छन् । उनीहरुको पीडामा मल्हम लगाउने प्रयास गरिरहेका छन् । एनआरएन जापानले सुनामी पीडितको सहयोगार्थ संचालन गरेको अभियान यसैको उदाहरण हो । एनआरएनको उद्देश्य अनुरुप हामी प्रवासमा रहेका नेपालीहरु जन्मभूमी र कर्मभूमीप्रति हामी उत्तिकै समर्पित हुनै पर्दछ भन्ने मान्यता राखेर तदनुरुप सक्दो गर्दै आएका छौं ।
एनआरएनको स्थापनाकाल देखि सक्रिय मैले एनआरएन जापानको राष्ट्रिय समन्वय परिषदको दुई कार्यकाल सदस्य र एक कार्यकाल अध्यक्ष पदमा रहेर सफलतापूर्वक सम्पन्न गरिसकेको छु । त्यसअघि र पछि पनि एनआरएनको गतिविधि र यसको कार्ययोजनासँग अत्यन्त निकट रहेर आफ्नो क्षमताले भ्याएसम्म सघाउने काम गरिरहेको छु ।
२०११ को सेप्टेम्बर १७ र १८ मा एनआरएन जापानको आयोजनामा जापानको टोकियोमा करिब दुइलाख ब्यक्तिहरु सहभागी नेपाल महोत्सव सम्पन्न भएको छ । त्यस अवसरमा मेरो आफ्नै अध्यक्षतामा रहेको आयोजक कमिटीले एनआरएन जापानको पहलमा करिब एकलाख बीस हजार जापानी नागरिकलाई नेपाल बारे जानकारी दिन सफल भएको छ । यसले नेपालको पर्यटन क्षेत्रमा विशेष योगदान पुर्याउने छ । स्मरण रहोस, नेपाल सरकारले घोषणा गरेको नेपाल पर्यटन बर्ष २०११ लाई सफल बनाउन जापानका लागि नेपाल पर्यटन बर्ष नेपाली अवैतनिक दूतका रुपमा आफ्नो भूमिका निर्वाह गर्दै आएको छु ।
आफ्नो ब्यवसायका अलावा सामाजिक काम र नेपालीहरुलाई सहयोग नै मेरो ध्येय रहेको छ । एनआरएन जापानको अध्यक्ष रहँदा र अन्य पदमा रहेर कामगर्दाको अनुभव र अव एनआरएन अन्तर्राष्ट्रिय समन्वय परिषदलाई थप मजवुत र गतिशिल बनाएर लैजानु पर्छ, एकपल्टको नेपाली सधैंको नेपाली भन्ने नारा ब्यवहारमा उतार्नुपर्छ भन्ने अभिप्रायले अक्टोवर १२ देखि १४ सम्म काठमाडौंमा हुने पाँचौं विश्व सम्मेलमा अन्तर्राष्ट्रिय समन्वय समिति (आइसीसी ) को कोषाध्यक्ष पदमा आफ्नो उम्मेदवारी घोषणा गरेको छु ।
देशको आर्थिक विकास विना अन्य सर्वागिंण विकास असम्भव प्रायनै हुन्छ । त्यसैले देशको आर्थिक विकासकालागि केही योगदान पुगोस भनेर नेपालको पहिलो आर्थिक दैनिकको रुपमा कारोवारको सुरुआत गरेको छु । यो नेपालको आर्थिक विकासमा सहायक सिद्ध हुनुका अतिरिक्त सम्पूर्ण एनआरएनको साझा बन्नेमा विश्वस्त छु । एनआरएनमा मेरो योगदानको मूल्यांकन गर्दै मेरा श्रद्धेय अग्रजहरु, सहयात्री तथा सहकर्मीहरु र सम्पूर्ण एनआरएन साथीहरुले मलाइ यस गरिमामय पदमा निर्वाचित गराउनु हुनेछ भन्ने मेरो विश्वास रहेको छ । एनआरएन अभियानलाई सार्थक बनाउन तथा यसको स्थायित्व र यसका एजेन्डालाई अघि बढाउन सहयोग पाउनेमा आशाबादी रहेको छु ।
एनआरएन आइसीसीको कोषाध्यक्षको रुपमा मेरा केही एजेन्डाहरु
क. संस्थामा आर्थिक पारदर्शिता कायम राख्न पहल गर्ने छु ।
ख. आफ्नो कार्य अवधि अर्थात २ बर्षका बीचमा नेपालमा गैरआवासीय नेपाली संघको आफ्नै भवन निर्माणका लागि क्रियाशिल हुनेछु । दुई बर्षकाबीचमा एनआरएनएको आफ्नै छुट्टै भवन रहने छ ।
ग. एनआरएनए आइसीसीका दैनिक गतिविधि संचालन र यसको निरन्तरताकालागि एउटा कोषको स्थापनाका जोड दिने छु ।
घ. संस्थापक अध्यक्ष तथा एनआरएनएका बर्तमान प्रमुख संरक्षक डा. उपेन्द्र महतोज्यूको योजना हन्ड्रेड मिलियन डलर फन्डलाई ब्यवहारमा उतार्न प्रयत्नसिल रहनेछु । यस अभियानका अग्रजहरुको सहयोग र समर्थन पाएमा यस कार्यलाई अगाडि बढाउन कोषाध्यक्षको हैसियतले प्रमुख जिम्मेवारी लिने सोच बनाएको छु ।
ङ. त्यस्तै नेपालको पर्यटन प्रवर्धनकालागि विशेष ध्यान दिने छु । नेपाली राष्ट्रिय ध्वजाबाहक विमानसेवाको अवस्था राम्रो नभएको सबैलाई जानकारीमा नै रहेको छ । यसले स्वदेशी तथा विदेशी यात्रुलाई आवश्यक सेवा दिन नसकिरहेको र बार्षिकरुपमा अरवौं रकम विदेशिई रहेको छ । यस्तो अवस्थामा निकट भविश्यमा संचालन हुन लागेको भगवान बुद्ध एअरवेजलाई एनआरएनको साझा लगानीको परियोजनाका रुपमा अघि बढाउने प्रयास गर्ने छु । यसले नेपालको पर्यटन र समग्र आर्थिक विकासमा टेवा पुग्ने मेरो विश्वास छ ।
च. नेपालमा एनआरएनहरुको लगानी प्रवर्धनलाई महत्व दिदैं सामूहिक लगानीमा संचालन हुन सक्ने साना तथा ठूला परियोजनाहरु तयार गरी कार्यान्वयनका निम्ति वातावरण तयार विशेष पहल गर्ने छु ।
छ. म्युचुअल फण्ड सरकारले लागु गर्न नसकेको अवस्थामा BVI पद्धतीलाई लागु गरी म्युचुअल फण्ड खडा गर्ने प्रयास गर्ने छु ।
सामुहिक एजेण्डा
एनआरएनएको विकासकालागि हामीहरुसबैको सामूहिक एजेण्डाहरु पनि रहेका छन् ।
नेपालीका लागि नेपाली र एक पटकको नेपाली सधैको नेपाली भन्ने नारालाई सार्थक बनाउनु आवश्यक रहेको छ ।
त्यस्तै, गैरआवासीय नेपाली संघलाई एक टिमको रुपमा अघि बढाई, नेपालको चौतर्फि विकासमा टेवा पुर्याउने लक्ष्य रहेको छ । यसैलाई आधार बनाएर संस्था दर्ता गर्ने .
त्यस्तै, विदेशी नागरिकता लिए पनि नेपाली नागरिकता त्याग्न नपर्ने प्रावधान आगामी संविधानमा राख्न राजनीतिक दलहरुलाई अनुरोध गरी तार्किक निष्कर्शमा पुराउनु आवश्यक रहेको छ भने सरकारलाई गैरआवासीय नेपाली ऐनलाई संसोधन गर्न अनुरोध गरि गैरआवासीय नेपालीको परिभाषालाई ऐनमा सच्चाउने र गैरआवासीय नेपाली संघको विधान अनुरुपको १८२ दिन भन्दा बढी सार्क मुलुक बाहेकका देशमा बसोबास गर्ने नेपाली तथा नेपाली मुलका विदेशीलाई गैरआवासीय नेपालीको परिभाषामा समेट्नु आवश्यक रहेको छ ।
अनुभव
- कार्यसमिति सदस्य – गैरआबासीय नेपाली संघ राष्ट्रिय समन्वय समिति जापान २००४–२००८
- अध्यक्ष – गैरआवासीय नेपाली संघ राष्ट्रिय समन्वय समिति जापान २००८ -२०१०
- विशेष सल्लाहकार – गैरआवासीय नेपाली संघ राष्ट्रिय समन्वय समिति जापान २०१०-२०११
- संरक्षक – गैरआवासीय नेपाली संघ राष्ट्रिय समन्वय समिति जापान २०११
- एनआरएन आइसीसीका सम्पूर्ण कार्यक्रममा ब्यक्तिगत र संस्थागत सहभागिता
- संयोजक – नेपाल फेस्टिबल (जापान) २०११
शिक्षा
- प्रारम्भिक शिक्षा – सिद्धार्थी बनस्थलि माबि
- उच्च शिक्षा – टोकाइ विश्वविद्यालय जापान
व्यवसायिक संलग्नता
संस्थापक अध्यक्ष – टीवीआइ ग्रुप जापान (बहुराष्ट्रिय कम्पनी)
अध्यक्ष – टीवीआइ पब्लिकेशन्स काठमाडौं (कारोवार राष्ट्रिय दैनिक )
अन्य संलग्नता
अध्यक्ष – बीबी ट्रस्ट
अध्यक्ष – नेपाली ब्यवसायी संगठन जापान
अवैतनिक दूत – नेपाल पर्यटन बर्ष २०११
निर्देशक – जापान नेपाल सोसाइटी
संस्थापक
यदु भट्ट शिक्षा पुरस्कार एवं बीबी युथ अवार्ड
रचना
हीरा गीति एल्वम (गीत रचना)
यहाँहरुको साथ, सहयोगको आशा र भरोसाको अपेक्षा राख्दै काठमाडौंमा हुने पाँचौ विश्वसम्मेलनमा भेट्ने बाचा गर्दछु ।
भवन भट्ट
टोकियो, जापान
