टोकियो – जापानी महिला हत्यामा सन् १९९७ देखि जेलमा रहेका नेपाली नागरिक गोविन्दप्रसाद मैनाली निर्दोष देखिएका छन् । उनले हत्या गरिएकी महिलाको शरीरबाट परीक्षणका लागि निकालिएको बिर्य र रौं फरक देखिएपछि उनी निर्दोष हुन सक्ने प्रमाणहरु पाइएका छन् ।
सन् १९९७ मार्च १९ मा मृत भेटिएकी यौनकर्मी यासुको वातानावेको हत्या अभियोगमा मुछिएका मैनालीको हालै भएको डीएनए परीक्षणमा नतिजा उल्टो आएको हो ।
‘वातानावेको शररिमा भेटिएको रौं र कन्डममा रहेको वीर्यको नमुना परीक्षणमा मैनालीको डीएनए नमिलेको पाइएको छ ।’
गोविन्दलाई न्याय दिलाउन गठन भएको नागरिक समुहका एक सदस्य तोयोहिसा आजुमाका अनुसार मैनालीको डीएनए परीक्षण शुक्रबार मात्रै सम्बद्ध नौ जना वकिलहरुलाई वितरण गरिएको छ । वकिललाई बुझाइएको रिपोर्टमाथि अध्ययन गरेर केही सातामा मैनालीको न्यायिक स्थितिबारे स्पष्ट हुने जानकारी दिए । मैनाली निर्दोष रहेकोबारे सञ्चारमाध्यममा आएका समाचारको आधिकारिकता बुझ्ने काम भयरहेको परराष्ट्र सचिव मदनकुमार भट्टराईले बताए ।
४४ वर्षीय मैनालीलाई १४ वर्षदेखि योकोहामास्थित कारागारमा राखिएको छ । मैनालीका श्रीमति र दुई छोरी छन् ।
जापानी कानुनअनुसार मैनाली निर्दोष रहे उनले क्षतिपूर्ति पाउने छन् ।
