टोकियो – जापानको टोकियोस्थित हानेदा विमानस्थलका भन्सार अधिकारीहरूले एक यात्रुको साथबाट कीर्तिमानी १५ किलो कोकिन बरामद गरेका छन् । अधिकारीहरूले बुधबार जानकारी दिएका अनुसार यो जापानको इतिहासमा हालसम्मकै ठूलो परिमाणको कोकिन बरामद हो ।
भन्सार अधिकारीहरूले कोकिन १५ वटा क्यान्डीको बाकसभित्र लुकाइएको अवस्थामा एउटा सुटकेसबाट फेला पारे । यसको बजार मूल्य करिब ३७२ मिलियन येन (२.४ मिलियन डलर) रहेको अनुमान गरिएको छ । यी सामान २५ वर्षीय क्यानाडाली नागरिकसँग भएको सुटकेसबाट बरामद गरिएका हुन् ।
आरोपितले आफू निर्माण क्षेत्रमा कार्यरत रहेको बताएका छन् । उनी डिसेम्बर २१ मा बेलुकी १०ः३० बजे टोरन्टोबाट हानेदा विमानस्थल आइपुगेका थिए । सामान्य भन्सार जाँचको क्रममा कोकिन फेला परेको र उनलाई अर्को दिन बिहानै पक्राउ गरिएको हो ।
हानेदा भन्सार शाखाले जनवरी ८ मा अभियोजनकर्ताहरूलाई आपराधिक उजुरी दायर गरेको थियो । पछि अभियोजनकर्ताहरूले उनलाई औपचारिक रूपमा अभियोग लगाएका छन् ।
