काठमाडौं – अमेरिकाको लस एन्जलसमा भएको आगलागीमा परी मृत्यु हुनेको संख्या २४ पुगेको छ । लस एन्जलसका स्वास्थ्य अधिकारीहरूले मृतकको संख्या २४ पुगेको पुष्टि गरेका हुन् । यसअघि १६ जना बेपत्ता रहेका जानकारी दिइएको थियो ।
क्यालिफोर्नियाका मौसमविद्हरूले अझै पनि तीव्र हावा चल्ने र त्यसबाट आगलागी झनै फैलिन सक्ने चेतावनी दिएका छन् । अग्नि नियन्त्रकहरूले आगो निभाउने प्रयास जारी राखेका छन् । आगलागीमा परी हजाराैँ भवनहरू ध्वस्त भएका छन् । ठूलो संख्यामा जनावरहरू पनि मरेका छन् ।
के हो गुलाबी तरल पदार्थ ?
लस एन्जलसमा आगो नियन्त्रण गर्न विमानहरूबाट आगोमा गुलाबी रङको तरल पदार्थ निरन्तर खसालिरहेको देखिएको छ । यो आगो निरोधक अर्थात्, आगो वा जल्ने प्रक्रियालाई ढिलो बनाउने पदार्थ हो । यो गुलाबी पदार्थ पानी, नुन (रसायन) र मलको मिश्रण हो । यसमा मूलतः अमोनियम फस्फेट भएको घोल हुन्छ ।
आगो जल्न अक्सिजन चाहिन्छ । तर, यो रासायनिक मिश्रणले आगोमा अक्सिजन आपूर्ति रोक्छ, ताकि आगो छिटो फैलिन नपाओस् ।
