समाचार सुन्नुहोस :
काठमाडौँ – इजरायली हवाई आक्रमणले लेवनानको युद्धग्रस्त दक्षिणी क्षेत्रमा अवस्थित मस्जिदलाई ध्वस्त पारेको लेबनानी आधिकारिक मिडियाले आइतबार जनाएको छ । पछिल्लो समयमा इजरायलले आक्रमण अभियानलाई तीव्र बनाएको छ । लेबनानको राष्ट्रिय समाचार एजेन्सीका अनुसार, आइतबार बिहान ३:४५ बजे इजरायली लडाकु विमानले कफर टिबनिट गाउँमा रहेको मस्जिदलाई लक्षित गर्दै हवाई आक्रमण गरेको थियो ।
गाउँका मेयर फुआद यासिनले उक्त मस्जिद १०० वर्ष पुरानो रहेको र यसले स्थानीय समुदायका लागि एकताको प्रतीकको रूपमा काम गरेको बताउनुभयो । यो मस्जिद विशेष अवसरहरूमा धार्मिक पूजा र समारोहहरू गर्ने महत्त्वपूर्ण स्थान रहेको थियो ।
लेबनानका अधिकारीहरूले इजरायलको निरन्तरको आक्रमणले लेबनानमा एक हजार २६० भन्दा बढी मानिसहरूको ज्यान लिनुका साथै दश लाखभन्दा बढी मानिस विस्थापित भएको बताएका छन् ।
