समाचार सुन्नुहोस :
काठमाडौँ – धौलागिरी हिमाल आरोहणका क्रममा हराएका पाँच जना रसियाली पर्वतारोहीको मृत्यु भएको पुष्टि भएको छ। आइतबार बिहानदेखि सम्पर्कविहीन भएका ती पर्वतारोहीको खोजीका लागि पठाइएको हेलिकोप्टरसहितको उद्धार टोलीले मंगलबार उनीहरुको निधन भएको जानकारी दिएको हो।
मृतक पर्वतारोहीहरूमा अलेक्जेन्डर दुशेको डमित्री शालिलेभोइ भ्लादमिर चिस्तिकोभ ओलेग कुर्गलोभ र मिखाइल नोसेन्कोको मृत्यु भएको जिल्ला प्रहरी कार्यालय म्याग्दीका डिएसपी भरत श्रेष्ठले जानकारी दिए। एक अन्य पर्वतारोही भालेरी सामालोलाई भने हेलिकोप्टरमार्फत उद्धार गरी काठमाडौँ ल्याइएको छ।
ती पर्वतारोहीहरू धौलागिरीको ८१६७ मिटर शिखरतर्फ आरोहणको क्रममा ७७०० मिटर उचाइबाट तल खसेर ७१०० मिटरमा पुगेका थिए। तीन हप्ता अघि आइएम ट्रेकिङ एन्ड एक्सपिडिसनको आयोजनामा उनीहरूले यात्रा सुरु गरेका थिए। यो शरद ऋतुमा धौलागिरी हिमालको आरोहणका लागि १४ जना पर्वतारोहीले अनुमति लिएका छन्।
