भद्रकालीमा सहकारी पीडित र प्रहरीबीच धकेलाधकेल

समाचार सुन्नुहोस : 

काठमाडौँ – काठमाडौंको भद्रकालीमा आइतबार दिउँसो सहकारी पीडितहरू र प्रहरीबीच झडप भएको छ। सिंहदरबारतर्फ अघि बढ्न खोज्दा प्रदर्शनकारीहरू र प्रहरीबीच धकेलाधकेल भएको हो।

एक सय दिनभन्दा बढी समयदेखि रिले अनसनमा रहेका सहकारी पीडितहरूले सर्वपक्षीय एक्यबद्धतामा बृहत जनआन्दोलनको आयोजना गरेका थिए। सिंहदरबार पुग्ने क्रममा उनीहरूलाई रोक्ने प्रयास गर्दा प्रहरीसँग तनाव उत्पन्न भएको थियो, जसका कारण आन्दोलनकारीहरू तितरबितर भए।

पीडितहरूले गत जेठ ११ गतेदेखि अनसन जारी राखेका छन्। सहकारी बचतकर्ता संरक्षण राष्ट्रिय अभियान महासंघले देशभरका ३५० सहकारी संस्थाका १४ लाख सदस्यहरूको समर्थनमा यो आन्दोलन चलाइरहेको छ। महासंघका अनुसार, यी पीडितहरूले सहकारीहरूबाट कुल दुई खर्ब ५० अर्ब रुपैयाँ फिर्ता पाउन बाँकी छ।