काठमाडाैं – गत शनिबार रुकुमपश्चिममा ४९ वर्षीया महिलाको हत्या गर्ने युवकलाई प्रहरीले पक्राउ गरेको छ । प्रहरीले हत्या आरोपमा रुकुम पश्चिम चौरजाहरी नगरपालिका-११ माथिल्लो सकेंना बस्ने २३ वर्षीय प्रेम मल्ललाई पक्राउ गरी सार्वजनिक गरेको हो ।
प्रेमको मायाजालमा परेकीले सानोभेरी गाउँपालिका-४, लामचौरकी सुशीला मल्लले विवाह गर्न दबाब दिएपछि हत्या भएको खुलेको छ । सुशीला र प्रेमबीच डेढ वर्ष अगाडि जाजरकोट रिम्ना मेलामा चिनजान भएको र त्यतिबेला फोन नम्बर साटासाट गरेर बेला-बेला भेटघाट हुने गरेको अनुसन्धानमा खुलेको प्रहरीले जनाएको छ ।
गत शुक्रबार सुशीला आफ्नै घरमा मृत अवस्थामा फेला परेकी थिइन् । प्रहरीका अनुसार घाँटीमा सल बेरिएको अवस्थामा घाँटी, निधार र अन्य शरीरको भागमा चोटपटक लागेको अवस्थामा शव बरामद गरिएको थियो । साउन २१ गते सोमबार प्रेम भेटघाटका लागि सुशीलाको घरमा गएको स्थानीय बताउँछन् ।
सोही दिन राति दुवै जनासँगै बसेको र साउन २२ गते मंगलबार बिहानै उठेर दुवै जना रिम्ना बजार गएर घुमेको प्रहरीले जानकारी दिएको छ । विवाहका लागि सुशीलाले प्रेमलाई दबाब दिएपछि आरोपितले फलामको तावा, सिलौटोलगायतका घरेलु हतियार प्रयोग गरी सलले घाँटी बाँधेर हत्या गरेको खुलेको प्रहरीले जनाएको छ ।
सोधपुछका क्रममा प्रेमले घटनापश्चात् मृतक सुशीलाको मोबाइल साथमा लिई आफ्नो कोठामा लुकाएर राखेको बताएपछि प्रहरीले सो मोबाइल पनि बरामद गरेको छ । प्रेमविरुद्ध कर्तव्य ज्यान मुद्दामा रुकुम जिल्ला अदालतबाट पाँच दिनको म्याद थप अनुमति लिई थप अनुसन्धान भइरहेको प्रहरीले जानकारी दिएको छ ।
