समाचार सुन्नुहोस :
काठमाडौँ – नुवाकोटको शिवपुरीमा बुधबार भएको एअर डाइनेस्टीको हेलिकप्टर दुर्घटनामा निधन भएका पाइलट (क्याप्टेन) अरुण मल्लको शव परिवारलाई हस्तान्तरण गरिएको छ। त्रिवि शिक्षण अस्पताल, महाराजगञ्जले पाइलट मल्लको शव परिवारलाई बुझाएको हो।
त्यसैगरी, दुर्घटनामा ज्यान गुमाएका चार जना चिनियाँ नागरिकको पहिचान गर्न आवश्यक तथ्याङ्क सङ्कलनको काम भइरहेको छ। त्रिवि शिक्षण अस्पतालको फोरेन्सिक विभागका प्रमुख डा. गोपालप्रसाद चौधरीका अनुसार चिनियाँ नागरिकहरू जुताड ताङ, ताइ ली, यीयाम वु, र जेमिङ जीको शव पहिचानका लागि आवश्यक प्रक्रिया चलिरहेको छ। ती शवहरूको पोस्टमार्टम सकिएको छ।
बुधबार दिउँसो काठमाडौँबाट रसुवाको स्याफ्रुबेसीतर्फ चिनियाँ पर्यटक लिएर उडेको एअर डाइनेस्टीको हेलिकप्टर नुवाकोटको शिवपुरी गाउँपालिका–७, सूर्यचौरमा दुर्घटनाग्रस्त हुँदा पाइलट मल्लसहित पाँच जनाको मृत्यु भएको थियो।
