टोकियो – कुनै समय थियो नयाँ गीत सुन्न हेर्नका लागि महिनौँ कुर्नु पर्थ्यो । तर त्यो समय अहिले छैन प्रायः दैनिक एक न एक नयाँ गीत सार्वजनिक भएकै हुन्छ ।
त्यसमा पनि लोक शैलीका गीत र विदेशी गीतले यतिखेर दर्शक तानिरहेका छन् यतिखेर । अहिलेका गीतमा धेरै तडकभडक भएका चकलेटी गीत सुनिन्छन् तर मथिङ्गल नै हल्लाउने भावनात्मक गीत कमै सुनिन्छन् । यो सूत्र सङ्गीतमा मात्र होइन, अन्य क्षेत्रमा पनि देखिएको छ । मौलिकता र नेपाली कथा बोलेका गीत बिरलै सुन्न पाइन्छ ।
तर जापानमा रहँदै आएका सर्जक तोरण थापा मगरले मौलिकतालाई भुलेका छैन । परदेशमा रहेर पनि नेपाली गीत सङ्गीतमा टेवा पुर्याउँदै आएका तोरणका शब्द रचनामा रहेको गीत ‘मेरो कथा मेरो गीत..’ भर्खरै सार्वजनिक भएको छ । परिस्थितिवश छुट्टिएर बस्नु परेका प्रेमीको कथा समेटिएको गीतमा ताराश्रीस मगरले स्वर दिएकी छन् । उनी गायन रियालिटी शो ‘द भ्वाइस अफ नेपाल’ सिजन–३ की फस्ट रनरअप हुन् ।
केटा पात्रले दुईटी केटीसँग प्रेम गरेको विषयलाई उठाएको गीतको म्युजिक भिडियो पनि निकै उत्कृष्ट बनेको छ । भिडियोमा केटीले माया गर्ने केटाको अर्कै केटीसँग पनि अफिअर गरेको देखाइएको छ । अर्को केटीसँग अफिअर रहेको थापा पाएपनि पहिलो प्रेमिकाले उसलाई छोडेर अर्कैसँग बिहे गर्छिन् भने केटाले मन मराएको केटीको पनि अर्कैसँग प्रेम रहेको देखाइएको छ ।
गीतका उत्पादक पनि तोरण थापा मगर हुन् भने मिस्टर सुबोधले सङ्गीत भरेका छन् । विशाल राईको निर्देशन र सुसन रोक्का मदन राईको सम्पादन रहेको गीतको म्युजिक भिडियोमा सुभाष जे थापा, स्वस्तिका राना मगर, अभिनभ खड्का, राजन हमाल र प्रेक्षा थापाको अभिनय देख्न सकिन्छ ।
आजकालका युवा पुस्ताको मनोभावनालाई कथामा उतारिएको गीत भिडियो निकै उत्कृष्ट बनेको छ । मार्मिक शब्द संयोजक रहेको गीत श्रोता दर्शकले मन पराउने अपेक्षा गरिएको छ ।
