काठमाडौं – आईसीसी विश्वकप क्रिकेट लिग-२ अन्तरगत नेपालले आज ओमानसँग प्रतिस्पर्धा गर्दैछ। अमेरिकाको ह्युस्टनस्थित मौसा क्रिकेट स्टेडियममा खेल नेपाली समय अनुसार राति सवा नौ बजेदेखि सुरु हुनेछ। जारी लिगको शीर्ष स्थानमा रहेको ओमानका लागि यो सिरिज अन्तिम हुनेछ। अंक तालिकाको शीर्ष स्थानमा रहेको ओमानले अहिलेसमम ३३ खेलबाट ४० अंक बनाएको छ।
प्रतियोगितामा सबैभन्दा कम खेल खेलेको नेपालले १२ खेलमा १२ अंक बनाएको छ। जसमा ६ खेलमा जित निकाल्दा ६ खेलमा हारेको छ। लिग टुमा नेपालले ओमानसँग अहिलेसम्म चार खेल खेल्दा तीन खेलमा हार ब्यहोरेको छ भने एक खेलमा मात्र जित निकालेको छ।
सिरिज अन्तर्गत नेपालले दोस्रो खेल अमेरिकाविरुद्ध जुन ११ मा खेल्नेछ। नेपालले तेस्रो खेलमा फेरि ओमानविरुद्ध जुन १४ र अन्तिम खेलमा नेपालले अमेरिकाविरुद्ध जुन १५ मा खेल्ने तालिका रहेको छ।
