नेपालमा कोरोनाः थप ७ जनाले ज्यान गुमाए, ७४२ मा संक्रमण

काठमाडौं – नेपालमा पछिल्लो २४ घण्टामा थप ७४२ जनामा कोरोना भाइरस संक्रमण पुष्टि भएको छ । योसँगै नेपालमा कोरोना संक्रमितको संख्या २ लाख ५४ हजार ५१४ पुगेको स्वास्थ्य तथा जनसंख्या मन्त्रालयले जनाएको छ ।

पछिल्लो २४ घण्टामा एक हजार ७९ जना उपचारपछि डिस्चार्ज भएका छन् । योसँगै नेपालमा निको हुनेको संख्या २ लाख ४४ हजार ७४३ पुगेको मन्त्रालयले जनाएको छ । गत २४ घण्टामा ६ हजार ३५१ जनाको पिसिआर परीक्षण गर्दा ७४२ जनामा कोरोना पुष्टि भएको हो । योसँगै नेपालमा पिसिआर परीक्षण हुनेको संख्या १८ लाख ७७ हजार १८१ पुगेको छ ।

आज थप ७ जना कोरोना संक्रमितको मृत्यु भएको छ । योसँगै नेपालमा कोरोनाबाट ज्यान गुमाउनेको संख्या एक हजार ७९५ पुगेको मन्त्रालयले जनाएको छ । हाल ४२१ जना क्वारेन्टाइनमा छन् ।