हङकङबासीलाई कोरोनाको निःशुल्क खोप, सिनोभ्याक र फाइजरको खोप मगाइयो

काठमाडौं – हङकङबासी सबैलाई कोरोनाविरुद्धको खोप निःशुल्क दिइने भएको छ । हङकङकी कार्यकारी प्रमुख क्यारी लामले यहाँका सबै बासिन्दालाई निःशुल्क खोप लगाइने शनिबार घोषणा गरेकी हुन् ।

हङकङको जनसंख्या ७५ लाखभन्दा बढी छ । सरकारको घोषणअनुसार अब यी सबैलाई कोरोनाविरुद्धको खोप निःशुल्क प्रदान गरिने छ । हङकङले चिनियाँ कम्पनी सिनोभ्याक र अमेरिकी कम्पनी फाइजरको गरी १ करोड ५० लाख डोज खोप मगाएको पनि साउथ चाइना मर्निङ पोस्टले जनाएको छ ।

लामले शनिबार मध्यान्न सिनोभ्याक र फाइजरसँगै अर्को एक औषधि निर्माता कम्पनीसँग पनि हङकङले सहकार्य गर्न लागेको जानकारी दिइन् । खोपको आएपछि हङकङको जीवनशैली लयमा फर्किने लामको आशा छ । एजेन्सी