काठमाडौँ – जर्मन बायोएनटेक औषधि निर्माता कम्पनी र यसको अमेरिकी साझेदार फाइजरले आफूले तयार पारेको कोभिड–१९ विरुद्धको खोपको प्रयोगको लागि भारतमा अनुमति मागेको छ ।
फाइजरको भारतीय शाखाले भारतको औषधि नियमन निकाय द सेन्ट्रल ड्रग्स स्ट्यान्डर्ड कन्ट्रोल ओर्गनाइजेसनमा इमर्जेन्सी उपयोग अधिकार अन्तर्गत कोभिडको भ्याक्सिन प्रयोग गर्ने अनुमति मागेको हो । यसको साथै फाइजर भारतमा कोभिड भ्याक्सिनको अनुमति माग्ने पहिलो कम्पनि बनेको छ ।
फाइजरले ४ डिसेम्बरमा अनुमतिका लागि आवेदन दिएको भारतीय मिडियाहरुले उल्लेख गरेका छन् । भारतमा फाइजरको भ्याक्सिन आयात र वितरण गर्न सिटी-१८ ले अनुमति मागेको हो । यस अघि बेलायत र बहराइनले फाइजरको भ्याक्सिन प्रयोग गर्न अनुमति दिइसकेका छन् । त्यस्तै अमेरिकाले पनि केहि दिनमा नै अनुमति दिन सक्ने बताइएको छ ।
फाइजरको भ्याक्सिन ९५ प्रतिशत प्रभावकारी भएको नतिजा आएपछि अब प्रयोग गर्न अनुमति माग्ने र दिने क्रम शुरु भएको छ । फाइजरको यो भ्याक्सिन माइनस ७० डिग्री तापक्रममा स्टोर गर्नुपर्ने भएकाले आम रुपमा उपलब्ध गराउन भने समस्या देखिएको छ ।
