काठमाडौँ – जापानमा एकै दिनमा सर्वाधिक धेरै व्यक्तिमा कोरोनाभाइरस पाइएको छ।
यसैबीच जापानले कोरोना भाइरसको संक्रमण नियन्त्रणका लागि सीमा नाकामा कडाइ गर्ने निर्णय गरेको छ ।
विश्वभर कोरोना भाइरसको महामारी बढ्दै गएपछि आफ्नो सीमा नाकामा कडाइ गर्ने निर्णय गरेको हो ।
जापानले आफ्नो मुलुकमा अमेरिका, क्यानडा, चीन, दक्षिण कोरियासहित अधिकांश यूरोपेली मुलुकबाट आउने गैर–जापानी नागरिकमा प्रतिबन्ध लगाउने निर्णय गरेको छ भने आफ्ना नागरिकहरुलाई विभिन्न ७३ मुलुकको भ्रमण रद्द गर्न आग्रह गरेको छ ।
यसअघि नै चिनियाँ र दक्षिण कोरियाली नागरिकलाई जापान आउन निषेध गरिएको थियो ।
सरकारले बाहिरबाट आउने जापानी नागरिकलाई भने मुलुकमा १४ दिन क्वारेन्टाइनमा राख्ने निर्णय गरेको बीबीसीले जनाएको छ । अहिलेसम्म जापानमा कोरोना भाइरसबाट १ हजार ९५३ जना संक्रमित भएका छन् भने ५६ जनाको ज्यान गइसकेको छ ।
