टोकियो – एप्पल कम्पनीले अब आइफोन पुरै वायरलेस बनाउने भएको छ । ढिलोमा अबको सात वर्षपछि पहिलोपटक एप्पलले चार्जिङ केबललाई पर्ण रुपमा हटाउने भएको छ ।
कम्पनीले आगामी आइफोन मोडलका लागि चार्जिङ केबल र पोर्ट हटाइ पूरै वायरलेस प्रविधि अपनाउने एप्पलका एक वरिष्ठ विश्लेषकले बताएका हुन् । उनका अनुसार आइफोनका सबैभन्दा महङ्गा मोडललाई बाँकीबाट छुट्याउनका लागि भएपनि कम्पनीले पूर्ण वायरलेस प्रविधि अपनाउनेछ । एप्पलले यसअघि आइफोन ८ का लागि वायरलेस चार्जिङ डक्स ल्याएको थियो ।
एप्पलले आगामी वर्ष आइफोनका पाँचवटा मोडल लञ्च गर्ने तयारी गरिरहेको बताईएको छ । कम्पनीले आगामी वर्षको बीचतिर ४ दशमलव ७ इञ्चको मोडल सार्वजानिक गर्नेछ भने अन्तिम महिनातर्फ फाइभ-जी चल्ने ६ दशमलव ७ इञ्चसम्मका मोडल बाहिर ल्याउनेछ । यसअघि जेपी मोर्गन विश्लेषकले एक रिपोर्टमा गरेका अनुमानमा पनि यही जानकारी थियो । एप्पलले भने तत्काल यसबारे कुनै प्रतिक्रिया जनाएको छैन ।
लामो समयसम्म एउटै किसिमको डिजाइनमा आधारित रहँदै आएको एप्पलले आगामी दिनहरुमा आफ्नो व्यापारलाई बुस्ट गर्नकै लागि भएपनि उल्लेखनीय परिवर्तन ल्याउने अधिक सम्भावना रहेको छ । किनकी आइफोन एप्पलको आम्दानीको सबैभन्दा ठूलो स्रोत हो । तर केही समय यता एप्पलको नाफामा गिरावट आएको पाइएको छ । त्यस्तै आइफोनका हेडफोन ज्याक पनि २०१६ मा आइफोन सेभेन पश्चात हटाइएको थियो । त्यसैले आइफोनलाई पूर्ण रुपमा वायरलेस बनाउन यसको चार्ज गर्ने युएसबी-सी पोर्ट पनि हटाउनुपर्ने हुन्छ । जसले यसलाई कुनै होल नभएको पहिलो स्मार्टफोन बनाउन सक्छ । त्यस्तै आइफोनले पूर्ण वायरलेस नीति अपनाउन हेडफोन पनि वायरलेस बनाउने बुझिएको छ ।***
