काठमाडौं – नेपाली क्रिकेट स्टार सन्दीप लामिछाने दुइटा अन्तर्राष्ट्रिय क्रिकेट लिगका लागि झण्ड दुई करोडमा अनुवन्धित भएका छन् । उनी गएराति भएको ड्राफ्टमा इङ्गिलस फ्रेन्चाइज ‘द हन्ड्रेड बल’ र युएईमा हुने टी-१० लिगका लागि अनुवन्धित भएका हुन् । एक सय बलको प्रतियोगिता ‘द हन्ड्रेड बल’ आगामी जुलाईमा इग्ल्यान्ड र वेल्समा हुनेछ ।
यसका लागि उनलाई बिर्मिङघम फोनिक्सले एक लाख पाउन्डमा अनुवन्धित गरेको हो । यसको नेपाली एक करोड ४५ लाख भन्दा बढी हुन्छ । यस प्रतियोगितामा आठ टीम सहभागी हुनेछन् । त्यस्तै, गएराति भएको ड्राफ्टमा युएईमा हुने टी-१० लिगका लागि कर्नाटका टस्कर्सले अनुवन्धित गरेको हो । उनी पहिलो चरणमै छनोटमा परेका छन् ।
गत वर्ष उनले केरला टिमबाट खेलेका थिए । यो वर्ष कर्नाटकाले लिएको हो । यस वर्ष उनी ४० हजार अमेरिकी डलर अर्थात ४५ लाखभन्दा बढीमा अनुवन्धित भएका छन् ।गत सिजनमा उनी ३० हजार अमेरिकी डलर अर्थात ३४ लाख रुपैयाँमा अनुवन्धित भएका थिए । यो प्रतियोगिता नोभेम्बर १५ देखि २४ सम्म युएईको अबुधावीमा हुनेछ । यसमा पनि आठ टीमले प्रतिस्पर्धा गर्नेछन् ।
