टोकियो – विगत आधा दशकदेखि जापानलाई कर्मथलो बनाउँदै आएकी गायिका सोना केसीले तीजको साँगीतिक कोसेली ’बिरानो देश’ बजारमा ल्याएकी छिन् ।
आफ्नै यु-ट्युव च्यानलमार्फत गायिका केसीले उक्त गीत हालै सार्बजनिक गरेकी हुन् । खासगरी मोडलिङबाट साँगीतिक क्षेत्रमा प्रवेश गरेकी केसी पछिल्लो समयमा गायनमा पनि उत्तिकै क्रियाशील छिन् । 
चेलीलाई त्यसै पनि माइतीको आँगन प्यारो हुन्छ, त्यसमाथि तीजको बेला माइतीभन्दा धेरै टाढाको देश परदेशमा हुने चेलीका प्रतिनिधिमुलक वेदनालाई गीतमा उतार्न खोजिएको छ ।
परदेशमा जतिसुकै रंगीचंगी दुनियाँ, साथीसंगी, धनदौलत र सुखसयल संभव भए पनि तीजको बेला माइतीको पिढीमा बसेर आमाको हातले बनाएको मीठो दर खाँदाको जस्तो अलौकिक आनन्द अन्यत्र नभेटिने आशयको भाव गीतले बोकेको छ ।
गायिका केसीको ’बिरानो देश’ मा खासगरी तीजको समयमा माइती र चेलीबीचको सम्बन्ध, सामिप्यता र महत्वलाई अत्यधिक उजागर गर्न खोजिएको छ ।
तीजको गीत ’बिरानो देश’ मा यशोदा ठकुल्लाको लय, शब्द, कृष्ण विकको एरेञ्जर, श्याम श्वेत रसाईलीको मिक्सिङ रहेको छ भने फिचरिङमा स्वयम गायिका केसी, कल्पना केसी, सिताराम भट्टराई लगायतलाई देख्न सकिन्छ ।
’स्वदेश तथा विदेशमा रहनुहुने नेपाली गीत, संगीतप्रेमी समस्त शुभचिन्तक दर्शक, स्रोताहरुले ’बिरानो देश’ सुनेर-हेरेर सुझाव, सल्लाह र प्रतिक्रिया दिनुहोला’ – गायिका केसीले भनिन् – ’तपाईहरुकै सुझाव, सल्लाह, सहयोग र समर्थनरुपी प्रेरणाका कारण मलाई अगाडि बढ्न थप ऊर्जा प्राप्त भईरहेको छ र भईरहने अपेक्षा गरेकी छु ।’
गायिका केसी राष्ट्रिय लोक तथा दोहोरीगीत प्रतिष्ठान जापान शाखाकी सहसचिव समेत रहेकी छिन । ***
