काठमाडाैं – दसैंको पूर्वसन्ध्यामा धरानस्थित कृषि उपज बजारमा अाज करिव ३ करोड रुपैयाँको खसीबोका बिक्री भएको छ । अघिल्लो शुक्रबार सोही बजारमा करिव डेढकरोड रुपैयाँको खसीबोका बिक्री भएको थियो ।
स्थानीय किसानले व्यापारीलाई प्रतिकिलो सरदर ४ सय ५० रुपैयाँको दरले बिक्री गरेको आधारमा दुई शुक्रबार साढेचार करोड रुपैयाँको खसीबोका बिक्री भएको कृषि उपजबजारका व्यवस्थापक लक्ष्मण भट्टराईले बताउनुभयाे । उहाँकाअनुसार धेरै संख्यामा किनेको खसीबोकालाई व्यापारीले मासु व्यवसायी र व्यक्तिगतरुपमा बिक्री गरेको मूल्यको हिसाव गर्ने हो भने करिव ८ करोड रुपैयाँको कारोबार हुन पुग्छ ।
चाडपर्वको बेला मासु प्रयोजनका लागि पूर्वी पहाडी जिल्लाहरु खोटाङ, भोजपुर, तेह्रथुम, धनकुटा र सुनसरीबाट दुईसातामा वर्षकै धेरै खसीबोका बिक्री हुने गरेकाे उहाँकाे भनाइ छ । । धरानमा बिक्री गर्नका लागि टाढाका जिल्लाबाट तीनदिनअघि नै आएर कृषि बजारले उपलव्ध गराएको ठाउँमा बस्ने गरेका छन् ।
