डडेल्धुराबाट नेविसंघका चार अध्यक्ष

काठमाडौँ – काँग्रेसको प्रभावशाली भ्रातृ संगठन नेविसंघमा मुुलुकको दुर्गम क्षेत्र भनेर चिनिएको सुदूपश्चिमबाट हालसम्म चार जनाले नेतृत्व लिने अवसर पाएका छन् । 

अझ संयोग भन्नुपर्छ चारैजना अध्यक्षको पुख्यौली घर डडेल्धुरा हो । नेविसंघको दोस्रो अध्यक्ष बन्नुभएका शेरबहादुर देउवा हाल पार्टीका सभापति हुनुहुन्छ । त्यसपछि काँग्रेस नेता एनपी साउँद नेविसंघको सातौँ अध्यक्ष बन्नुभएको थियो । त्यस्तै सुदूपश्चिमकै केशव सिंह नेविसंघको १३ औँ अध्यक्ष बन्नुभएको थियो भने महर १८ औँ अध्यक्ष बन्नुभएको छ ।

सङ्घको ११ औँ महाधिवेशनको उद्घाटन गत साउन २३ गते भए पनि निर्वाचन भने भदौ १ गते झन्डै २० घण्टा निरन्तर भएको थियो । बिहीबार सार्वजनिक भएको मत परिणामअनुसार अध्यक्ष महरले एक हजार ३३४ र उहाँका निकटतम प्रतिद्वन्द्वी आचार्यले एक हजार २०९ मत प्राप्त गर्नुभएको हो ।