राष्ट्रिय पुस्तकालय बोरामा

काठमाडौँ – तीन सय वर्ष पुराना किताब बोरामा कोचिएका छन् । वर्ष दिनदेखि एउटै कोठामा बेहाल अवस्थामा राखिएकाले ढुसी लागेको छ । भित्तातिरका पुस्तक धमिराले खान थालेको छ ।

यस्तै छ अहिले देशको एकमात्र राष्ट्रिय पुस्तकालयको हालत । गत वर्षको भूकम्पले राष्ट्रिय पुस्तकालय रहेको ललितपुरको हरिहरभवन जीर्ण भएपछि डेढ लाख पुस्तकहरू बोरामा कोचेर राखिएका छन् । भूकम्पबाट पुस्तक जागिएपनि ठाउँको अभावमा काठमाडौँको ज्ञानेश्वरस्थित महेन्द्र भवन उच्चमाविको दुई तले भवनमा थुपारिएको आजको कान्तिपुर दैनिकमा खबर छ ।

मुनिको तलामा फर्निचर र केही पत्रपत्रिका तथा माथिल्लो तलामा ऐतिहासिक पुस्तकहरू छन् । अधिकांश पुस्तक प्लास्टिकका बोरामा पोको पारेर चाङमाथि चाङ राखिएका छन्।