संगीतकार स्व.गुरुङको राष्ट्रिय सम्मानका साथ अन्त्येष्टि गरिने

काठमाडौँ – वरिष्ठ संगीतकार अम्बर गुरुङको राष्ट्रिय सम्मानका साथ अन्त्येष्टि गरिने भएको छ ।

संस्कृति, पर्यटन तथा नागरिक उड्डयन मन्त्री आनन्द पोखरेलको प्रस्तावमा प्रधानमन्त्रीको निर्देशनमा राष्ट्रिय सम्मान दिन लागिएको हो । गुरुङलाई थप के-के सम्मान दिने भन्ने बारे भने भोलि बस्ने मन्त्रीपरिषद्को बैठकले निर्णय गर्ने बताइएको छ । राष्ट्रिय सम्मानको चाजोपाँजो मिलाउनका लागि गृह मन्त्रालयलाई निर्देशन दिईसकिएको छ ।

स्रोतका अनुसार गुरुङलाई नेपाल प्रहरी र सैनिक टुकडीले सलामी समेत दिने छ । गुरुङको आज बिहान २ बजेर ३७ मिनेटमा ग्रान्डि अन्तर्राष्ट्रिय अस्पतालमा उपचारको क्रममा मृत्यु भएको थियो ।

अहिले उहाँलाई अन्तिम शवलाई प्रज्ञा भवन कमलादीमा श्रद्धाञ्जलीको लागि राखिएको छ । उहाँको आजै पशुपतिमा अन्तिम दाहसंस्कार गरिने छ ।