काठमाडौँ – राष्ट्रिय गानका संगीतकार एवम् वरिष्ठ संगीतकार अम्बर गुरुङको ७९ वर्षको उमेरमा निधन भएको छ ।
स्वास्थ्यमा समस्या आएपछि धापासी स्थित ग्राण्डी अस्पताल उपचार गराईरहनुभएका गुरुङको मङ्गलवार बिहान २ बजेर ३७ मिनेटमा निधन भएको अस्पताल प्रशासनले जनाएको छ । लामो समयदेखि मधुमेह उच्च रक्तचाप तथा पार्किन्सन्सको उपचार गराइरहनुभएका गुरुङलाई गतसाता एस्पिरेसन न्युमोनिया, पेट तथा अन्न नलिको रक्तश्राव (युजिआई ब्लिडिङ) को उपचारका लागि भर्ना गरिएको थियो ।
खानेकुरा सर्किएर खानाको नलीमा पुग्दा उनको श्वास प्रश्वासमा समस्या सुरु भएको थियो । र, आइतबार रातीबाट उँहालाई भेन्टिलेटरमा राखिएको थियो । दार्जिलिङको लालढिकीमा बाबु उजीरसिंह गुरुङ र आमा श्रीमती रेणुका गुरुङको कोखबाट वि.सं १९९४ मा गुरुङको जन्म भएको थियो। गुरुङको पुख्यौली घर गोरखा जिल्लाको रिसिङ हो ।
गुरुङले नेपाली राष्ट्रिय गान (सयौँ फुलका थुङ्गा हामी एउटै माला नेपाली)मा समेत सङ्गीत दिएका छन्।
