काठमाडौं – सप्तरी डाक्नेश्वरी नगरपालिकाकी एक महिलाले कतारमा रहेका श्रीमानले फोनबाटै ‘तलाक’ दिएको गुनासो गरेकी छन् । नन्दले झुटो कुरा पुर्याएर तलाकको अवस्थामा पुर्याई दिएको उनले गुनासो गरेकी हुन् ।
राजविराजमा पत्रकार सम्मेलनको आयोजना गरी सप्तरीको डाक्नेश्वरी नगरपालिका ७ ब्रह्मपुर सिघिंया टोल बस्ने २२ वर्षिया सनिजा खातुनले यस्तो गुनासो गरेकी हुन् । उनले विवाहको तीन वर्ष हुन लाग्दा पनि श्रीमान् मो. आकुवले विवाह दर्ता र नागरिकता नबनाई दिएको र सो बनाईदिन आग्रह गर्दा ‘किन हतार गरेको’ भन्दै रिसाउने गरेको बताइन् ।
हाल उनका श्रीमान् आकुव रोजगारीका सिलसिलामा कतारमा छन् । डेढ वर्षदेखि कतारमा रहेका श्रीमानलाई नन्द मरियम खातुनले मेरोबारेमा झुटो कुरा लगाई भड्काएको र अन्त्यमा श्रीमानले ५ महिना अघि फोनबाटै ‘तलाक’ दिएपछि आफू विच्चलीमा परेको उनले बताइएकी छन् । पछिल्लो मंसिर १९ गते राती आफू गाउँको एक वैवाहिक कार्यक्रममा सरिक हुन गएका बेला नन्द मरियमले कोठामा रहेको दराजबाट सुनको सिक्री, टिका, नथुनी, अँगुठी गरी करिब ५ तोला र चाँदीको १० तोलाको विभिन्न गरगहना चोरी गरी लगेको उनको आरोप छ ।
आफूविरुद्ध नन्द मरियमले समय–समयमा झुटो कुरा लगाएर श्रीमानलाई भड्काउने र अन्त्यमा श्रीमानले फोनबाटै ‘तलाक’ दिँदा आफू घर न घाटकी भएको उनको गुनासो छ । उनले नन्द मरियमविरुद्ध जिल्ला प्रहरी कार्यालयमा जाहेरी समेत दिएकी छन् । जाहेरीमार्फत घरमा चोरी गर्ने तथा आफूलाई तलाक सम्मको अवस्थामा पुर्याउनेमाथि कारबाही हुनु पर्ने उनको माग छ ।
Samudrapari.com is No. 1 Nepalese online News Portal based in Japan established in the year 2006.
