समाचार सुन्नुहोस :
काठमाडौँ – दक्षिण कोरियाको गिम्हे अन्तर्राष्ट्रिय विमानस्थलमा मङ्गलबार राति उडान गर्नुअघि एयर बुसानद्वारा सञ्चालित एयरबस विमानमा आगलागी भएको छ। हङकङका लागि उड्ने तयारी गरिरहेको विमानको पछाडिका भागहरूमा लागेको आगो नियन्त्रणमा ल्याइएको छ।
यातायात मन्त्रालयका अनुसार विमानमा रहेका १६९ यात्रु, छ जना चालकदलका सदस्य र एक इन्जिनियरलाई आपतकालीन स्लाइडको प्रयोग गरी सुरक्षित रूपमा बाहिर निकालिएको छ। उद्धारका क्रममा तीन जना सामान्य घाइते भएको राष्ट्रिय अग्नि नियन्त्रण निकायले जनाएको छ। दमकल परिचालन गरी स्थानीय समयानुसार राति ११ः३१ बजे आगो पूर्ण रूपमा निभाइएको थियो। हालसम्म आगलागीको कारण पत्ता लाग्न सकेको छैन। मन्त्रालयले आगलागी भएको विमान ए३२१ मोडेलको रहेको पुष्टि गरेको छ।
यो घटना दक्षिण कोरियाको मुआन अन्तर्राष्ट्रिय विमानस्थलमा जेजु एयरको यात्रु विमान दुर्घटना भएको एक महिनापछि भएको हो। डिसेम्बर २९ मा भएको उक्त दुर्घटनामा १८१ यात्रु सवार विमान धावनमार्गबाट चिप्लिएर आगलागी भएको थियो। जसमा दुई थाई नागरिक बाहेक सबै पीडित दक्षिण कोरियाली थिए। प्रारम्भिक अनुसन्धान अनुसार, उक्त दुर्घटना विमानको इन्जिनमा चराहरू ठोक्किएको कारण भएको हुनसक्ने अधिकारीहरूले बताएका छन्।
