काठमाडौं – राष्ट्रिय स्वतन्त्र पार्टी (रास्वपा) की केन्द्रीय सदस्य ज्वाला संग्रौलाले आफ्नो पार्टी सभापति रवि लामिछाने गृहमन्त्री भएको बेला एक जना बलात्कारीलाई जीवनदान दिएको दाबी गरेकी छन् । उनले शनिबार सामाजिक सञ्जालमार्फत यो विवादास्पद अभिव्यक्ति दिएकी हुन्, जसले राजनीतिक वृत्तमा निकै चर्चा पाएको छ ।
संग्रौलाले सुरुमा लेखेको स्टाटसमा ‘रवि दाइले गृहमन्त्री हुँदा जीवनदान दिएको’ भन्ने वाक्यांश समावेश गरेकी थिइन्, तर केही समयमै उनले त्यो वाक्य हटाएर अर्को भिन्न सन्देश राखिन् । उनको नयाँ स्टाटसमा भनिएको छ, ‘एउटा बलात्कारी आज निक्कै उफ्रिँदै छ रे त साथीहरू। अहिले कुर्सी त्यस्को बाउको, त्यसपछि हाम्रो दाइको। याद गर काजी ।’
यो स्टाटसले नेकपा एमालेका नेता महेश बस्नेतप्रति लक्षित गरेको आकलन गरिएको छ । संग्रौलाको यो अभिव्यक्ति महेश बस्नेतसँग जोडिएर विवादमा रहेकी शोभा पाठकप्रति पनि एक प्रकारको सहानुभूति देखाउने प्रयासको रूपमा लिइएको छ ।
उनले बारम्बार पाठकको न्यायका लागि सोसल मिडियामा स्टाटस लेखिरहेकी छिन् । रास्वपाले आफूलाई सुशासनको पार्टी भन्दै आएको छ, तर ज्वाला संग्रौलाको यो बयानले आफ्नो पार्टी सरकारमा रहँदा बलात्कारीलाई जीवनदान दिएको भन्ने कुरा उजागर गरेको देखिन्छ ।
