समाचार सुन्नुहोस :
काठमाडौँ – भारतको महाराष्ट्र राज्यको जलगाउँ जिल्लामा भएको रेल दुर्घटनामा परी निधन भएका नेपाली नागरिकहरूको पहिचान खुलेको छ। परराष्ट्र मन्त्रालयका अनुसार, उक्त दुर्घटनामा सात नेपालीसहित १२ जनाको मृत्यु भएको छ। मृत्यु भएका नेपालीमध्ये कैलालीका कमला नवीन भण्डारी (४३) र लछिराम पासी (४०) छन्। यस्तै, अछामका हिन्दुराम विश्वकर्मा (११), नन्दराम पद्य विश्वकर्मा (४४), मैसारा कामी (४२), र जोक्ला उर्फ कला कामी (६०) को पनि मृत्यु भएको छ। बाँकेका राधेश्याम राधको (३२) पनि निधन भएको छ ।
घाइते भएका चार नेपालीमध्ये तीन जनाको स्थानीय अस्पतालमा उपचार भइरहेको छ भने गम्भीर घाइते एकजनालाई जलगाउँस्थित गोदावरी अस्पतालमा भर्ना गरिएको छ। दुर्घटनापछि परराष्ट्र मन्त्रालयले मृतकका परिवारप्रति समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेको छ। मृतकका शव नेपाल ल्याउन र घाइतेको उपचारमा सहजीकरण गर्न नयाँ दिल्लीस्थित नेपाली दूतावासले भारतीय सरकारी निकायहरूसँग समन्वय गरिरहेको छ। दुर्घटना माघ ९ गते साँझ ५:०५ बजे जलगाउँ जिल्लाको परधाडे स्टेशननजिकै भएको थियो।
