समाचार सुन्नुहोस :
काठमाडौँ – करिब १२ घण्टासम्म सेवा बन्द गरेपछि टिकटकले अमेरिकामा पुनः आफ्नो सेवा सुरु गरेको छ। नवनिर्वाचित राष्ट्रपति डोनाल्ड ट्रम्पले एपलाई बचाउन कदम चाल्ने आश्वासन दिएपछि कम्पनीले यो निर्णय लिएको हो। टिकटकले आफ्नो प्रयोगकर्ताहरूलाई स्वागत गर्दै धन्यवाद व्यक्त गरेको छ। कम्पनीले भनेको छ, “तपाईंको धैर्यका लागि धन्यवाद। राष्ट्रपति ट्रम्पको प्रयासका कारण टिकटक फेरी अमेरिकामा उपलब्ध भएको छ।”
यसअघि, शनिबार रातिदेखि टिकटकले अमेरिकामा आफ्नो सेवा बन्द गरेको थियो। एपलाई प्रतिबन्ध गर्ने नयाँ कानुन लागु भएपछि एप्पल तथा गुगल प्ले स्टोरबाट पनि टिकटक हटाइएको थियो। चिनियाँ कम्पनी बाइटडान्सको अन्य एप लेमन८ र क्यापकट पनि हटाइएको थियो ।
तर, सोमबारको शपथग्रहण समारोहपछि आफूले टिकटकलाई प्रतिबन्ध गर्ने कानुन लागु गर्न ढिलाइ गर्ने कार्यकारी आदेश जारी गर्ने प्रतिबद्धता जनाएका थिए। त्यसपछि टिकटकले तुरुन्तै अमेरिकामा आफ्नो सेवा पुनः सञ्चालनमा ल्याएको हो। अमेरिकामा टिकटकका झन्डै १७ करोड प्रयोगकर्ता रहेका छन्।
