समाचार सुन्नुहोस :
काठमाडौँ – परराष्ट्रमन्त्री डा. आरजु राणा देउवाले सोमबार कतारका विदेश राज्यमन्त्री डा. मोहम्मद बिन अब्दुलाजिज अल-खुलाइफीसँग टेलिफोन वार्ता गर्दै हमासद्वारा बन्धक बनाइएका नेपाली युवा विपिन जोशीको रिहाइका लागि सहयोगको अपिल गरेकी छन्।
हमास र इजरायलबीच शान्ति वार्तामा मध्यस्थकर्ता रहेका खुलाइफीसँग कुरा गर्दै मन्त्री राणाले कतार नेपालको घनिष्ठ मित्र राष्ट्र रहेको स्मरण गराउँदै विपिनको रिहाइमा विशेष पहल गर्न आग्रह गरिन्। उनले कतारले युद्धविराम र शान्ति वार्ताका प्रयासमा गरेको भूमिकाको प्रशंसा पनि व्यक्त गरिन्।
वार्ताको क्रममा खुलाइफीले हमासलाई युद्धविरामको दिशामा अघि बढाउन र अपहरणमा रहेका व्यक्तिहरूको रिहाइका लागि कतारले सक्रिय प्रयास गरिरहेको बताए। उनले हमासद्वारा केही बन्दी रिहा गर्ने प्रक्रिया सुरु भएको जानकारी गराउँदै, नेपाली युवा विपिनको रिहाइलाई प्राथमिकता दिने प्रतिबद्धता जनाए। साथै, पहिलो चरणमा सम्भव नभएमा बाँकी प्रक्रिया अन्तर्गत विपिन अपहरणमुक्त हुने विश्वास व्यक्त गरे।
