टोकियो – नेपाली चलचित्र ‘कार्साङ’ जापानको राजधानी टोकियोमा जनवरी २७ तारिखका दिन प्रदर्शन हुने भएको छ । शेर्पा समुदायको मौलिक कथा र संस्कृतिलाई पर्दामा जीवन्त रूपमा उतारिएको चलचित्रको ‘ओम शान्ति ओम कम्पनी’ले जापान प्रदर्शन अधिकार लिएर टोकियोमा प्रदर्शन गर्न लागेको हो ।
कम्पनीका निर्देशक ईश्वर श्रेष्ठकाअनुसार चलचित्र यही जनवरी २७ तारिख सोमबारका दिन टोकियो जेरो हलमा साँझ ६ बजे विशेष प्रदर्शन हुनेछ । शेर्पा समुदायको जीवनशैली, संस्कार र संघर्षलाई यथार्थपरक ढंगले प्रस्तुत गर्दै ‘कार्साङ’ले अभाव र दुःखकाबीच संस्कारलाई जोगाउन गरिएको संघर्षको कथा बोलेको छ ।
यम शेर्पाको निर्देशनमा बनेको चलचित्रमा दयाहाङ राई, सिर्जना निङलेखु र जितु नेपालजस्ता चर्चित कलाकारहरूको अभिनय छ । चलचित्र ‘यार्सा फिल्म्स’ र ‘पुरुषोत्तम प्रधान फिल्मस्’को प्रस्तुति हो, जसका निर्माता तथा छायाकार पुरुषोत्तम प्रधान हुन् । सह निर्माताको भूमिकामा गोविन्द बोहरा रहेका छन् भने कार्यकारी निर्माता आङछिरिङ शेर्पा हुन् ।
