समाचार सुन्नुहोस :
काठमाडौँ – राष्ट्रिय स्वतन्त्र पार्टीका सभापति रवि लामिछाने काठमाडौं प्रहरी हिरासतमा नै रहने भएका छन्। काठमाडौं जिल्ला अदालतका न्यायाधीश माधवप्रसाद अधिकारीको एकल इजलासले सोमबार उनलाई पुनः अदालतमा पेस गर्नेगरी प्रहरी जिम्मा लगाउने आदेश दिएपछि उनी हिरासतमा नै रहने भएका हुन ।
आइतबार बबरमहलस्थित काठमाडौं जिल्ला अदालतमा लामिछानेको बयान सुरु भए पनि थुनछेक बहस नसकेपछि उनलाई हिरासतमा राख्ने निर्णय गरिएको हो। अदालतले धरौटी मागे उनी रिहा हुनेछन् भने बयान नसकिएसम्म उनलाई हिरासतमा नै राखिने जनाइएको छ। लामिछाने सुर्य दर्शन सहकारी ठगी प्रकरणमा गत कात्तिक २ गते पक्राउ परेका थिए। कास्की जिल्ला अदालतबाट ६५ लाख धरौटी बुझाएर रिहा भए पनि काठमाडौंस्थित स्वर्णलक्ष्मी बहुउद्देश्यीय सहकारी संस्थामा रकम अपचलनको आरोपमा उनी काठमाडौं जिल्ला अदालतमा हाजिर भएका थिए।
उक्त सहकारीबाट ६९० जना बचतकर्ताको १ अर्ब १९ करोड रुपैयाँभन्दा बढी हिनामिना भएको आरोप लागेको छ। पुस २१ गते जिल्ला प्रहरी परिसर, काठमाडौंले लामिछानेसहित ३९ जनाविरुद्ध मुद्दा दर्ता गर्न सिफारिस गरेपछि यस प्रकरणमा उनको बयान लिइँदै छ। शुक्रबार मात्रै काठमाडौं आइपुगेका लामिछाने आइतबार अदालतमा उपस्थित भएर बयान दिएका थिए। तर समय अभावका कारण बहस नसकिएकाले उनले कम्तिमा एक दिन हिरासतमा बस्नुपर्ने भएको हो।
