काठमाडौं – गायक प्रकाश सपूतको चलचित्र ‘वसन्त’को गीत ‘साँझ पर्यो झमक्क’ सार्वजनिक गरिएको छ । गीतमा निर्देशक प्रकाश सपूतको शब्द, संगीत र स्वर छ । स्वरमा प्रकाशलाई शान्ति श्री परियारले साथ दिएकी छन् । गीतले चलचित्रका दुई मुख्य पात्र प्रकाश र स्वस्तिमा खड्काबीचको प्रेम देखाएको छ ।
मौसम हिमालीको कोरियोग्राफी तथा प्रविन भट्टको सम्पादन रहेको गीतमा गायक तथा निर्देशक प्रकास सपुतले बागलुङ जिल्ला आसपासमा परिचित यानिमाया, सालैजो र घाँस-दाउरा अनि मेलापातमा प्रयोग हुने टिपिकल ग्रामिण परिवेश देखाएका छन् । जसले दर्शकको मन जित्ने देखिन्छ ।
गीतको भिडियोमा प्रकाशसँगै स्वस्तिमासँगै, प्रभात पाल ठकुरी, श्री शिभान्सी र खड्कबहादुर पुन फिचर्ड छन् । आगामी चैत २२ गते प्रदर्शनमा आउने चलचित्रमा अनुप बराल, कमलमणि नेपाल, प्रकाश घिमिरेलगायत कलाकारको अभिनय रहेको छ ।
गलबन्दी प्रोडक्सनको प्रस्तुति सोसल ड्रामा चलचित्रको कथा, पटकथा र संवाद पनि प्रकाश स्वयंको छ । विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा ‘वसन्त’ले भन्नेछ ।
