एक दिनमै ८६ करोड कमाउने पहिलो फिल्म बन्यो ‘पुष्पा २’

समाचार सुन्नुहोस : 

काठमाडौँ – दक्षिण भारतीय अभिनेता अल्लू अर्जुनको मुख्य भूमिकामा रहेको फिल्म ‘पुष्पा २’ बक्स अफिसमा धमाका मच्चाउँदै नयाँ कीर्तिमान स्थापित गरिरहेको छ।भारतीय मिडिया दैनिक भास्करका अनुसार, फिल्मले केवल हिन्दी संस्करणबाट आइतबार ८६ करोड भारूको कमाइ गरेको छ। यससँगै, यो एकै दिनमा ८६ करोड भारू कमाउने पहिलो भारतीय फिल्म बनेको छ।

फिल्मले हालसम्म भारतीय बक्स अफिसमा ५२९ करोड ४५ लाख भारू र विश्वव्यापी रूपमा ८०० करोड भारूको आम्दानी गर्न सफल भएको छ। सुकुमार बान्द्रेडीले लेखन र निर्देशन गरेको यो फिल्ममा अल्लू अर्जुनसँगै रश्मिका मन्दना, फहद फासिल, जगपति बाबु, धनञ्जय, राव रमेश र सुनीलजस्ता कलाकारको दमदार अभिनय छ। फिल्मका निर्माता नवीन येर्नेनी र रविशंकर यममाञ्चिली हुन्। एक्सन, क्राइम र ड्रामाले भरिपूर्ण यो फिल्म ३ घण्टा २१ मिनेटको रहेको छ।