काठमाडौं – दक्षिण कोरियाका रक्षामन्त्री किम योङ ह्युनले राजीनामा दिएका छन् । मुलुकमा सैन्य शासन घोषणा गर्ने राष्ट्रपतिको कदमको सम्पूर्ण जिम्मेवारी आफूले लिने उनको भनाइ छ ।
जनतामा द्विविधा र चिन्ता फैलाएकोमा उनले माफी पनि मागेको मन्त्रालयद्वारा जारी विज्ञपितमा जनाइएको छ । उनलाई पनि पदबाट हटाउने सांसदहरुले माग गरेपछि किमले राजीनामा दिएका हुन् ।
तर, राष्ट्रपति युन सुक योलले स्वीकृत नगरुञ्जेल उनी पदमा रहने छन् । यसबारेमा युनले केही बताएका छैनन् । युन आफैँ महाभियोगको सामना गर्दै छन्। राष्ट्रपतिका अन्य स्टाफहरुले पनि राजीनामा दिएको बताइएको छ । युनको सो कदम चाल्नुमा किमको प्रभाव महत्त्वपूर्ण रहेको बताइन्छ ।
विपक्षी डेमोक्र्याटिक पार्टीले राज्यद्रोहको आरोपमा किममाथि छानबिन गर्न आह्वान गरेको छ । सो आरोप पुष्टि भए जन्मकैद वा मृत्युदण्डको सजाय हुन सक्छ ।
