जनकपुरधाममा मासु, माछा र मदिरा बिक्रीवितरणमा रोक

समाचार सुन्नुहोस : 

काठमाडौँ – जनकपुरधाममा सीताराम विवाहपञ्चमी महोत्सवका अवसरमा आजदेखि तीन दिनसम्म माछा, मासु र मदिरा बिक्री तथा वितरणमा प्रतिबन्ध लगाइएको छ। धनुषा जिल्ला प्रशासन कार्यालयले सूचना जारी गर्दै मंसिर २२ गते राति १२ बजेसम्म नगरक्षेत्रभित्र यी वस्तुको बिक्री, वितरण, र सेवन पूर्णतः रोक लगाएको हो। जनकपुरधाम उपमहानगरपालिकाको परिक्रमा क्षेत्र र परिक्रमा सडकको दायाँबायाँ समेत यो प्रतिबन्ध लागू हुनेछ।

प्रशासनका अनुसार मदिरा, माछा, मासु, पशुपक्षी काटमार, र अन्य नशालु पदार्थ निषेध गरिएको छ। स्थानीयवासीलाई पनि यस्ता क्रियाकलाप नगर्न र नगराउन अनुरोध गरिएको छ।

यो निर्णय धनुषाका प्रमुख जिल्ला अधिकारी राजुराम कडरियाको अध्यक्षतामा बसेको बैठकबाट गरिएको हो। विवाहपञ्चमी महोत्सव जनकपुर नगरदर्शनबाट सुरु भई रामकलेवा कार्यक्रमसँगै मंसिर २२ गते सम्पन्न हुनेछ।