काठमाडौँ – पाकिस्तानको दक्षिणपश्चिम बलुचिस्तान प्रान्तमा एक हतियारधारी समूहले रातभर गरेको आक्रमणमा २० जना कामदारको हत्या भएको छ। बलुचिस्तान पृथकतावादी लडाकु समूहहरूको गतिविधि केन्द्र भएको क्षेत्र हो, जहाँ नियमित रूपमा प्राकृतिक स्रोतहरूका परियोजनाहरूलाई आक्रमणको निशाना बनाइन्छ।
प्रहरी प्रमुख असिम शफीका अनुसार, डुकी जिल्लामा राति करिब ४० जना आक्रमणकारीहरूले आधा घण्टासम्म गोली चलाए। यस आक्रमणमा सात जना घाइते भएका छन् भने आक्रमणकारीहरूले खानीमा रहेको मेसिनरीमा आगोसमेत लगाए।
बलुचिस्तानका धेरै निकासी योजनाहरू विदेशी देशहरूको लगानीमा सञ्चालित छन्, जसलाई यी लडाकु समूहहरूले बारम्बार आक्रमणको निशाना बनाउँछन्। हालै बलुच लिबरेसन आर्मी (बीएलए) ले कराँचीमा भएको बम आक्रमणमा दुई चिनियाँ कामदारको मृत्युको जिम्मेवारी लिएको थियो।
आप्रवासी कामदारलाई लक्षित गरी गरिएका यी आक्रमणहरू पाकिस्तानको लागि एक ठूलो चुनौती बनेको छ। शुक्रबारको यो घटना पाकिस्तानमा एससीओ शिखर सम्मेलनको केही दिनअघि भएको छ। जसले देशको सुरक्षा स्थितिमा थप चिन्ता पैदा गरेको छ।
