काठमाडौं – राष्ट्रिय स्वतन्त्र पार्टी (रास्वपा)ले आत्मनिर्भर नेपाल अभियान सुरु गरेको छ । शनिबार अपराह्न पार्टीका उपसभापति डीपी अर्यालले पार्टी कार्यालयबाट घण्टी बजाएर अभियानको सुरु गरेका हुन् ।
सो अवसरमा पार्टी कार्यालयमा ५ वटा नीति मन्थनबारे छलफल भएको उनले जानकारी गराए । उनले देशमा युवालाई रोक्नका लागि स्टार्टअप जस्ता विभिन्न कार्यक्रमहरू पार्टीले अघि सारेको बताए । पार्टीको ‘आत्मनिर्भर नेपाल अभियान’ सुरु गर्दै रास्वपाले हरेक सुरुवात केही नयाँ कामबाट गरिरहेको उनको भनाई थियो ।
‘नेपालमै बस्न हाम्रा दाजुभाईहरुले के काम गरिरहनुभएको छ, भनेर देखाउने प्रयास स्वरूप यो कार्यक्रम गरिएको हो । अब आउने दिनमा केन्द्रमा मात्र नभएर प्रदेशमा पनि यस्ता कार्यक्रम गर्छौँ । हामीले हरेक सुरुवात केही न केही नयाँ, नेपालीको आवश्यकता आजको युवा पुस्तालाई कसरी यो देशमा रोक्न सकिन्छ प्रयास गरिरहेका छौँ,’ उनले भने ।
डा.प्रभात अधिकारी, हरि जोशी लगायतका युवाहरूले नेपाली युवालाई रोक्ने खालका स्टार्टअपका अवधारणा ल्याएको र त्यसबाट साना उद्योग व्यवसाय गर्न सकिने बताए ।
कार्यक्रममा कार्यवाहक महामन्त्री कवीन्द्र बुर्लाकोटीले नेपाललाई आत्मनिर्भर बनाउन खोज्ने जुनसुकै उद्यमीलाई राज्यको कार्यक्रममा समेटेर लैजान उनीहरूलाई प्रवर्द्धन गर्न चाहेको बताए । राजनीति कम र उत्पादन मूलक काम गर्नका लागि रास्वपा पार्टी बनेको उल्लेख गरेको उनको भनाई थियो ।
उनले नेपालमा अवसरको ढोका खोल्न सकेमात्र युवाहरू विदेश जानबाट रोकिने भएकोले नवप्रवर्तनको प्रदर्शनी राखिएको जानकारी दिए । नेपाली उत्पादनलाई प्राथमिकता दिई आत्मनिर्भर नेपाल बनाउने अभियान सुरु गरेको उनको भनाई छ ।
तपाईको प्रतिक्रिया
सम्बन्धित समाचार
