समाचार सुन्नुहोस :
काठमाडौँ – गाजाको नागरिक सुरक्षा विभागले शनिबार बिहान इजरायली हवाई आक्रमणमा ९ बालबालिका र ३ महिलासहित प्यालेस्टिनी परिवारका १५ सदस्यको ज्यान गएको जानकारी दिएको छ। मध्य गाजाको अल-जावैदामा रहेको अज्लाह परिवारको घरमा आक्रमण भएको नागरिक सुरक्षा प्रवक्ता महमुद बस्सलले पुष्टि गरेका छन्।
हालसम्म इजरायली सेनाले यस घटनाबारे कुनै प्रतिक्रिया दिएको छैन। ‘अल–जावैदाको अज्लाह परिवारको घर र गोदाममा भएको इजरायली आक्रमणबाट १५ जनाको मृत्यु भएको छ’, बस्सलले भने।
उद्धारकर्ताहरूले भग्नावशेषबाट शव निकालिरहेका बेला अहमद अबु अल-घौलले भने, ‘तीन वटा रकेटहरू सिधै घरमा खसेको थियो । भित्र बालबालिका र महिलाहरू थिए । उनीहरूको के दोष थियो ?’ इजरायल र हमासबीच १० महिनाभन्दा लामो समयदेखि जारी द्वन्द्वले गाजाको ठूलो क्षेत्रलाई भग्नावशेषमा परिणत गरिदिएको छ।
