समाचार सुन्नुहोस :
काठमाडौँ – भारतीय सीमासँग जोडिएको रौतहट जिल्लाको राजपुर नगरपालिकामा एक जना भारतीय नागरिकको घाँटी रेटेर हत्या गरिएको अवस्थामा शव फेला परेको छ। राजपुर-१ पिपरा भगवानपुरको पूर्वपट्टिको इद्रिस गेट नजिकैको हुलाकी सडक खण्डमा ४५ वर्षीय भारतीय नागरिकको शव भेटिएको हो।
घटनास्थलको प्रकृति अनुसार धारिलो हतियार प्रयोग गरी घाँटी रेटेर हत्या गरिएको प्रारम्भिक अनुमान रहेको कुरा जिल्ला प्रहरी कार्यालयका प्रवक्ता डीएसपी एलिजा गिरीले बताएकी छिन्। मृतकको गोजीबाट प्राप्त कागजातमा भारत बिहार मोतीहारीको ठेगाना उल्लेख गरिएको छ। तर, मृतकको पहिचान पुष्टि नभएसम्मको लागि नाम सार्वजनिक नगरिएको र शवलाई पोस्टमार्टमका लागि प्रादेशिक अस्पताल गौरमा पठाइएको प्रवक्ता गिरीले जानकारी दिएकी छिन्।
मृतकको शवको केही दूरीमा सिजे ०१-२५६८ नम्बरको मोटरसाइकल फेला परेको छ। उक्त भारतीय नागरिकको सोही स्थानमा हत्या गरिएको हो या अन्यत्रै हत्या गरेर शव त्यहाँ फालिएको हो भन्ने कुरा अझै खुल्न सकेको छैन। हत्या कसले र किन गर्यो भन्ने विषयमा अनुसन्धान भइरहेको जिल्ला प्रहरी कार्यालय रौतहटले जनाएको छ। स्थानीय बासिन्दाहरूले शव र मोटरसाइकल बेवारिसे अवस्थामा देखेपछि प्रहरीलाई खबर गरेका थिए।
