‘बर्मा गए पनि कर्मसंगै’ भनिएझैं दशकौं विदेशमा बसेता पनि आफ्नो नेपाली पारा देखाईहाल्नुपर्ने स्वभावका हामी नेपाली जो छौं, बेला बेलामा छताछुल्ल हुने गरी पोखिदैं आईरहेका छौं । अघिल्लो महिना मात्र सम्पन्न एनआरएनएको एघारौ महाधिवेशनमा राजधानीको स्वल्टी होटलमा देखिएको चर्तिकलाले विदेशमा बस्ने सारा नेपालीहरुलाई लज्जित बनाएको छ । अर्कोतिर बिसौं वर्षको लगानी रहेको एनआरएनको भविष्य र अभियानमा प्रश्नचीन्ह लागेको छ । अभियानका नाममा कुर्सीमोह हाबी भईदिंदा अरु सबै ओझेलमा परेका छन् । शीर्षस्थ नेतृत्व तहमै रहेकाहरुमा पटक-पटक यस्तो समस्या देखिएपछि अरुबाट के अपेक्षा गर्न सकिएला ? आवरणमा मात्रै सुकिला, मुकिला र सुटेड, बुटेड भएर के गर्ने चिन्तनमा खोट भएपछि झाँक्रीहरुले हुर्मत लिने नै भए ।
अभियान धरापमा त यसै पर्यो नै त्यसको असरका कारण विदेशमा रहेको नेपाली समुदायमा पनि तलसम्म ध्रुबिकरण एवं विखण्डित हुने खतरा बढेर गएको छ । यो सबैभन्दा चिन्ताको बिषय हो । यसको जिम्मा कसले लिने ? विजयी भएको भनिएको बद्रि समुहले वा समानान्तर कमिटी घोषणा गरेको आरके समूहले ? यतिसम्म गिरेर लोक त नहँसाएको भए हुने । एउटा माघले जाडो जाने थिएन । खोट त दूबै समूहमा देखियो नि त, कुरो धेरै र थोरैको जो छ । विदेशमा बस्ने ८० लाख नेपालीहरुको छाता संगठनको नेतृत्व गर्न हिम्मत गर्ने एनआरएनका नेताहरुको अभियानकेन्द्रीत नभएर आत्मकेन्द्रीत साँगुरो सोंचका कारण यस्ता घटनाहरु बारम्बार दोहोरिने गरेका छन् । एनआरएन अभियानमा स्वीकार्यताको दायरा फराकिलो बनाउँदै लैजानुपर्नेमा झन झन साँगुरो पार्दै खुम्च्याउने काम जो भईरहेको छ, यो शुभ संकेत होईन ।
केही वर्ष यता जापानमा नेपालीहरुको संख्या तीब्ररुपमा बढ्दो छ । नेपालीहरुको संख्या बढेसंगै यहाँ समस्याहरु मात्रै नभएर समस्याका प्रकृतिहरु पनि बढ्दो छन् । केहि वर्ष अघिसम्म जापान प्रहरीले संदिग्धको घेरामा राखिएका दर्जनौ नेपाली युवाहरुको फोटो देखाउँदै उनीहरुको बारेमा सोधीखोजी गर्दै हिड्ने अवस्था थियो । पछिल्ला वर्षहरुमा यो क्रम केहि कमी आएको सर्बत्र महशुस गरिएको थियो । जापान प्रहरीको बुझाईमा नेपालीहरु भोजभतेर र पार्टीजन्य कार्यक्रम गर्न औधी मन पराउँछन् । उनीहरु झगडालु स्वभावका हुन्छन् । पार्टीमा मदिरासेवन गरेपछि आफुहरुबीच नै ग्याङफाइट गर्ने गर्दछन् । यो भनाई पूरै सत्य मान्न नसकिएला तर पूरै असत्य पनि होईन । पछिल्ला दिनहरुमा नेपालीहरुबीच झैं-झगडाका घटना फेरि बाक्लिन थालेका छन् । कुनै कुनै घटना एकैचोटी जापानको मिडियामा आएपछि मात्रै थाहा हुन्छ । अधिकाँश झगडाको कारण मदिरा सेवनबाट हुने गरेको अध्ययनहरुबाट पुष्टि हुन्छ । हामी सात समुद्रपारिको बिरानो देशमा एउटा निश्चित उद्देश्य बोकेर आएका छौं, यहाँको सोसाइटी, यहाँको कल्चर, यहाँको सिष्टम, यहाँको अनुशासन र यहाँको जीवनशैलीबाट हामीले सिक्नुपर्ने कुराहरु धेरै छन् । तर हामी भने आफु आफुमा झैं-झगडा गरेर दुनियाँलाई तमासा देखाईरहेका छौं । विदेशमा एकजना नेपालीले बाटो बिराउँदा सारा नेपाली लज्जित हुनुपर्दछ । यसप्रकारका घटनाबाट कालान्तरसम्म हरेक क्षेत्रमा नकारात्मक असर पर्न जान्छ । त्यसो भएको हुनाले आ-आफ्नो टोल-छिमेक, सर्कल, स्कुल, कलेज वा कम्पनीमा यसप्रकारका अवाञ्छित गतिविधि हुन नदिन समाजका जिम्मेवार अगुवाहरुको अघोषित निगरानीपूर्ण विशेष भूमिका अपेक्षित छ ।
विश्व आज ग्लोबल भिलेजमा रुपान्तरित भईरहेको सन्दर्भमा मानिस पुर्ख्यौली थातथलोबाट आफुले चाहेको ठाउँमा बसाई ससाई गर्न स्वतन्त्र छ, चाहेको मुलुकमा गएर अध्ययन, अनुसन्धान, ब्यापार, ब्यवसाय वा रोजगारी गर्न सक्छ । त्यसैअनुरुप नेपालीहरु आज विश्वका सयौं मुलुकहरुमा पुगेर आफ्नो जीवनलाई सहज बनाउन प्रयत्नशील छन् । सोहि अनुरुप उनीहरुले थातथलो फेरे, भेषभूषा फेरे, रहनसहन फेरे, जीवनशैली फेरे तर आनीबानी फेरेनन्, स्वभाव फेरेनन् । जसको परिणामस्वरुप विदेशमा पनि हामी नेपालीहरु जम्मा हुँदासाथ हामी आफ्नो पारा देखाईहाल्छौं, आफ्नो विशेषता जनाईहाल्छौं । हामी बदलिनुपर्थ्यो, बदलिएनौं । अब बदलिनुपर्छ, उज्यालोको पर्व दीपावलीको शुभकामना ।
