समाचार सुन्नुहोस् :
काठमाडौँ – यही वर्ष भारतमा आयोजना हुने विश्वकप क्रिकेट प्रतियोगिताको ग्लोबल छनोट खेल जिम्बाबेमा आगामी जुनमा हुँदैछ । अन्तर्राष्ट्रिय क्रिकेट काउन्सिलले मंगलबार जिम्बाबेमा हुने क्वालिफायर प्रतियोगिताको खेलतालिका सार्वजनिक गरेको छ । नेपाल जिम्बाबेमा मुख्य प्रतियोगिता सुरु गर्नु अगाडि दुईवटा अभ्यास खेल खेल्नेछ । ३० जेठमा यूएईसँग र ३२ जेठमा ओमानसँग अभ्यास खेल खेल्नेछ ।
त्यसपछि ३ असाढमा नेपालले समूह चरणको पहिलो खेल घरेलु टिम जिम्बाबेसँग खेल्नेछ । दोस्रो खेल पाँच असाढमा अमेरिकासँग खेल्नेछ भने तेस्रो खेल वेस्टइन्डिजसँग ७ असाढमा खेल्नेछ । यस्तै समूह चरणको अन्तिम खेल ९ असाढमा नेदरल्यान्ड्ससँग खेल्नेछ ।
छनोट प्रतियोगितामा १० टिम रहेका छन् । दुई समूह विभाजन गरी समूहचरणका खेल खेलाइने छ । एक समूहबाट शीर्ष तीन टिम सुपर सिक्समा प्रवेश गर्नेछन् । सुपरसिक्समा सबै टिमले एकअर्कासँग खेलेपछि शीर्ष दुई टिम भारतमा हुने विश्वकपका लागि छनोट हुनेछन् ।
