काठमाडौं – नक्कली भुटानी शरणार्थी प्रकरणमा समातिएकालाई थप तीन दिन हिरासतमा राख्न प्रहरीले अनुमति पाएको छ । जिल्ला प्रहरी परिसर काठमाडौंको टोलीले आइतवार उनीहरुलाई म्याद थपको लागि अदालतमा उपस्थित गराएको थियो ।
पूर्व उपप्रधानमन्त्री टोपबहादुर रायमाझी, पूर्व गृहमन्त्री बालकृष्ण खाणलगायतलाई हिरासतमा राख्न अदालतले थप तीन दिनको म्याद दिएको हो। यस प्रकरणमा प्रहरीले हालसम्म १६ जनालाई पक्राउ गरेको छ । संगठीत अपराधमा म्याद थप गरेर प्रहरीले अनुसन्धान गरिरहेको छ । प्रहरीले अनुसन्धान फाइल सरकारी वकिलमा बुझाउने तयारी गरेको छ ।
वैशाख २७ गते बिहान काठमाडौंको चुच्चेपाटीबाट पूर्व गृहमन्त्री एवं कांग्रेस नेता बालकृष्ण खाण समातिए । यसले राजनीतिक क्षेत्रमा नयाँ तरंग ल्यायो। खाणसँगै उनका स्वकीय सचिव नरेन्द्र केसी पनि समातिए । ११ दिन फरार रहेका टोपबहादुर रायमाझी बैशाख ३१ गते काठमाडौंबाट समातिए । कांग्रेसका पूर्व सभासद आङटावा शेर्पाले प्रहरीमा आत्मसमर्पण गरे ।
