काठमाडौं – ईङलिश प्रिमियर लिग अन्तर्गत आर्सनल वेस्टह्याम युनाइटेडसँग बराबरीमा रोकिएको छ । आइतबार सम्पन्न खेलमा आर्सनल र वेस्टह्याम २-२ गोलको बराबरीमा रोकिएका हुन् ।
२-० को अग्रता जोगाउन नसक्दा आर्सनल बराबरीमा रोकिएको हो । आर्सनलका लागि खेलको सातौं मिनेटमा गाब्रियल जिससले र खेलको १०औं मिनेटमा मार्टिन ओडेगार्डले गोल गरेका थिए । आर्सनलका लागि खेलको ५२औं मिनेटमा बुकायो साकाले पेनाल्टी मिस गरेका थिए । वेस्टह्यामले खेलमा कमब्याक गर्दै खेलको ३३औं मिनेटमा सेड बेन्राहमा र खेलको ५४औं मिनेटमा जारोड बोवेनले गोल गर्दै खेल बराबरी गरेका थिए ।
यस बराबरीले आर्सनललाई उपाधिको होडमा धक्का पुगेको छ र उपाधिको दौड रोचक बनेको छ । शीर्ष स्थानमा रहेको आर्सनलको ३१ खेलमा ७४ अंक रहेको छ र एक खेल कम खेलको म्यानचेस्टर सिटीको ३० खेलमा ७० अंक रहेको छ । अब सिटीले एक खेल जितेमा आर्सनल केवल एक अंकले अगाडी हुने छ । त्यस्तै वेस्टह्याम युनाइटेडको ३० खेलमा ३१ अंक भएको छ र लिगमा १५औं स्थानमा रहेको छ ।
