काठमाडौं – संस्कृति पर्यटन तथा नागरिक उड्डयनमन्त्री सुदन किरातीले नेपाल वायुसेवा निगम (नेपाल एयरलाइन्स)को क्रमबद्ध तीन घटनाले निराशा बनाएको बताएका छन् । मन्त्री किरातीले सामाजिक सञ्जाल फेसबुकमार्फत नेपाल एयरलाइन्सको क्रमबद्ध तीन घटनाले धेरैलाई निराशा बनाएको उल्लेख गरेका छन् ।
उनले फेसबुकमा लेखेका छन्, ‘नेपाल वायुसेवा निगममा पछिल्लो समयमा भएका मलेसियाको नियमित फ्लाईट क्यान्सिल, दिल्लीमा जहाजको चक्कामा आएको समस्या, ११ घण्टा ढिलो गरी भएका उडान लगायतका शृंखलाबद्ध घटनाक्रमले धेरै महानुभावहरूलाई निराश बनाएका सन्देशहरू मलाई प्राप्त भएको छ ।’
यी घटनाले थप जिम्मेवार र समस्याप्रति अझ संवेदनशील बन्न प्रेरित गरेको उनले बताएका छन् । ‘मलाई यी घटनाहरूले निराश बनाएको छैन बरु थप जिम्मेवार र समस्याप्रति अझ संवेदनशील बन्न प्रेरित गरेको छ,’ उनले लेखेका छन् ।
मन्त्री किरातीले यो रोग पूरानो पीडा सहेर बस्न सक्ने स्थिति नभएको उल्लेख गरेका छन् । ‘हामी सबैलाई थाहा छ रोग पूरानो हो अब धेरै पीडा सहेर बस्न सक्ने स्थिति हामीलाई पटक्कै छैन,’ उनले लेखेका छन् ।
