समाचार सुन्नुहोस् :
काठमाडौँ – कतार विश्वकप विजेता टोली अर्जेन्टिनाका लियोनेल मेसीले राष्ट्रिय टिमबाट १०० गोल संख्या कटाएका छन् । नेपाली समय अनुसार बुधबार बिहान सकिएको खेलमा काराकाओविरुद्ध ह्याट्रिक गर्ने क्रममा मेसीले यो दुर्लभ संयोग आफ्नो नाममा लेखाएका हुन् । मेसीले १७३ खेल खेल्दा गोलसंख्या १०२ पुर्याएका छन् । मेसीभन्दा अगाडि दुई जना खेलाडी मात्रै छन् ।
पोर्चुगलका क्रिश्चियानो रोनाल्डोले १९८ खेलमा १२२ गोल गरेका छन् । इरानका अलि दाइ १४८ खेलमा १०९ गोल गरेर दोस्रो स्थानमा छन् । अब दोस्रो स्थानका दाइभन्दा मेसी ७ गोलले मात्रै पछाडि रहेका छन् । मेसीले काराकाओविरुद्ध खेलको २० औं मिनेटमा गरेको पहिलो गोलबाट राष्ट्रिय टिमका लागि १०० गोल पूरा गरेका हुन् । त्यसपछि ३३ र ३७ मिनेटमा मेसीले गोल गर्दा ह्याट्रिक पनि पूरा गरे ।
मेसीले खेलमा एक एसिस्टसमेत गरे ।
मैत्रीपूर्ण खेलमा अर्जेन्टिनाले काराकाओविरुद्ध ७–० गोलको फराकिलो जीत पनि हात पार्यो । यस अघिको मैत्रीपूर्ण खेलमा मेसीले पानामाविरुद्ध फ्रिकिकबाट शानदार गोल गर्दै ९९ संख्या पुर्याएका थिए । मेसीकै प्रेरणामा २०२२ मा अर्जेन्टिनाले कतारमा विश्वकपको उपाधि उचालेको थियो । मेसीले प्रतियोगितामा ७ गोल गरेका थिए । मेसी विश्वकपको सर्वोत्कृष्ट खेलाडी पनि चुनिएका थिए ।
मेसीले २००५ मा राष्ट्रिय टोलीका लागि डेब्यु गरेका थिए । १७ वर्षका अवधिमा मेसीले विश्वकप र कोपा अमेरिका जस्ता प्रतिष्ठित उपाधि दिलाउन प्रमुख योगदान गरेका छन् ।उनले २०१४ मा अर्जेन्टिनालाई फाइनलमा पुर्याएका थिए । पटकपटक टिमलाई कोपाको फाइनलमा पुर्याए पनि उनी २०२१ मा भने यो उपाधि जित्न सफल भए ।
