बार्सिलोना र म्यानचेस्टर युनाइटेडको बराबरी

काठमाडौँ – यूईएफए युरोपा लिग अन्तर्गत नकआउट चरणको प्लेअफको पहिलो लेगको खेलमा बार्सिलोना र म्यानचेस्टर युनाइटेड बराबरीमा रोकिएका छन्। स्पेनिस क्लब बार्सिलोनाको घरेलु मैदान क्याम्प नाउमा गएराति सम्पन्न खेलमा इङ्ग्लिस क्लब युनाइटेडसँग २-२ गोलको बराबरीमा रोकिएका हुन्।

पहिलो हाफ गोलरहित बराबरीमा रोकिएको खेलमा बार्सिलोनाले मार्को अलोन्सोको गोलमा ५० औं मिनेटमा अग्रता बनाएको थियो। तर, त्यसको दुई मिनेट नबित्दै युनाइटेडका मार्कस रासफोर्डले फ्रेडको पासमा गोल फर्काए।

रोमाञ्चक बनेको खेलको ५९ औं मिनेटमा बार्सिलोनाका जुलेस कोउन्डेले आत्मघाती गोल गर्न पुग्दा युनाइटेडले अग्रता बनायो। तर, कोउन्डेकै पासमा ७६ औं मिनेटमा राफिन्हाले गोल फर्काउँदा खेल २-२ गोलको बराबरीमा रोकिएको हो। यी दुई टोली फेब्रुअरी २४ मा युनाइटेडको घरेलु मैदान ओल्ड ट्राफोर्डमा आमनेसामने हुनेछन्।